Homenaxe á diáspora miñorana

Homenaxe á diáspora miñorana

Almuiña acode ao 82 aniversario do Círculo Social Val Miñor en Bos Aires

Vázquez Almuiña co presidente do centro, José Carlos Panteón.


REDACCIÓN - BAIONA A emigración miñorana estivo de festa o fin de semana. O Círculo Social Val Miñor en Bos Aires celebrou o seu octoxésimo segundo aniversario coa presenza do alcalde de Baiona, Jesús Vázquez Almuiña, e do presidente da Deputación do Pontevedra, Rafael Louzán. Como bos invitados, ambos levaron agasallos de aniversario ao centro galego.
O organismo provincial doou un cruceiro de pedra, colocado no patio interior do inmoble, e equipamento para unha sala de informática que permitirá aos emigrantes porse ao día en novas tecnoloxías e sentirse máis preto dos seus lugares de orixe. O Concello de Baiona tamén regalou á institución unha metopa e un pergamiño conmemorativo en nome de todos os seus veciños.
Centos de galegos e asturianos socios do centro asistiron ao acto no que o presidente do Círculo Social Val Miñor, José Carlos Panteón, expresou a súa gratitude a Vázquez Almuiña e Louzán pola súa presenza que "serve para unir" "aínda máis se cabe ás comunidades galegas no exterior coa terra nai Galicia".

"Joselín"

A ligazón do centro miñorano con Baiona é profunda. E é que foi fundado en 1928 por José Rodríguez Vicente, máis coñecido por "Joselín", e outros ilustres miñoranos que tiveron que emigrar a terras arxentinas por diversas razóns.
"Joselín" exerceu o xornalismo en Arxentina e participou activamente na creación de distintas publicacións xunto a personaxes da talla de Castelao. Pero tamén tivo un papel destacado na vila real, xa que exerceu como alcalde de Baiona entre 1924 e 1925 e ocupou o cargo de administrador nas Escolas Prol Vale, hoxe Instituto Escolas Proval, creadas por miñoranos enriquecidos en América co fin de estender a educación entre a poboación da comarca. O propio Concello de Baiona dedicoulle unha rúa fai anos como homenaxe á súa difusión do nome da vila polo mundo.
Na súa traxectoria profesional, José Rodríguez Vicente desenvolveu outras facetas como a de escritor, debuxante, humorista ou poeta. Así, gravou varios contos considerados hoxe imprescindibles para entender a realidade galega dos anos vinte do pasado século pola súa representación de escenas e costumes populares. O personaxe faleceu en 1928 tras recibir a Cruz do Mérito Civil, ademais do recoñecemento popular.