O Centro Galego de Hannover cualifica de calvario o peche do consulado

O presidente do Centro Galego de Hannover, Martín Maceiras, considera que o peche do consulado de España nesta cidade alemá suporá «un calvario» para toda a colectividade galega e, por extensión, española.

Maceiras, que naceu en Alemaña, criouse en Fene e regresou ao país fai 30 anos, explica que se trata dunha institución crucial para os case 4.000 galegos e máis de 8.000 españois, xa que ademais das funcións habituais tamén serve de asesoría laboral. O propio centro necesítao para os seus trámites coa Xunta e outras institucións. Cando desapareza, deberán desprazarse centenares de quilómetros.

Toda a colectividade organizou unha concentración fronte á sede consular o sábado, día 27, ás 12 horas. As entidades recollen firmas para protestar por unha decisión que o Ministerio de Asuntos Exteriores segue sen confirmar, aínda que Maceiras indica que as fontes que manexa son sólidas.