(25/02/2010)
As terceiras xornadas sociais de Cáritas de Noia xa están en marcha. Arrincaron o luns, cunha charla que contou co respaldo do público no que se empezou a falar do tema no que virará todos os actos previstos para este ano: a inmigración. A encargada de abrir a programación foi unha psicóloga e, mañá, cederáselle a testemuña a outros técnicos que tamén falarán dos problemas e necesidades das persoas que deben adaptarse a vivir en España. Nesta ocasión serán varios traballadores sociais do Concello de Ribeira os que falen do programa para inmigrantes que está en marcha no municipio. A cita será ás seis e media da tarde na casa de cultura.
Ademais de dar a coñecer o programa ribeirense, no acto previsto para mañá tamén falarán dúas persoas que saben ben o que é adaptarse á realidade dun novo país. Son Mar Twain e Edith Noemí, loxicamente, dous inmigrantes.
Xa o día 1 de marzo, terá lugar a última dos relatorios. Serán tres traballadoras sociais de Noia, Carmen García, María Vázquez e Mónica Mella, as que poñan punto e final ás xornadas deste ano. Farano nunha conferencia na que se falará das persoas maiores e tamén da controvertida lei de dependencia.
O director de Cáritas de Noia mostrouse satisfeito pola asistencia de público á primeira dos relatorios e animou aos veciños a seguir participando, dado que se trata de temas de rigorosa actualidade.
OBXECTIVOS | INTEGRACIÓN | FERRAMENTAS | LEXISLACIÓN | ORGANISMOS | NOVAS | CONTACTO
(c) 2009 FEGAMP, Federación Galega de Municipios e Provincias :: Texto legal
inmigracion@fegamp.es
Desarrolo: AVA Soluciones Tecnológicas