«Hai xente que estivo na emigración e ten morriña dalgún sabor»

Na avenida de Zamora sitúase o punto de encontro de inmigrantes, emigrantes retornados e curiosos dispostos a probar sabores novos. Terra Miña, irmá doutra tenda situada no barrio do Couto, leva catro meses ofrecéndolles a todos os produtos típicos dos seus países de orixe. Juan Carlos Iglesias é un dos socios deste establecemento.

-¿De que países importan principalmente?

-Temos produtos procedentes de Colombia, Venezuela, Brasil, Arxentina... en xeral, de toda Sudamérica, pero tamén de Senegal ou Romanía. Trátase de produtos que formaban parte da alimentación cotiá dos nosos clientes.

-¿Cal é o perfil do cliente de Terra Miña?

-Principalmente inmigrantes, que atopan aquí produtos difíciles de atopar noutros establecementos, pero tamén xente que estivo na emigración, que ten morriña dalgún sabor que aquí non é posible atopar e que quere explicarlle aos seus netos que comía cando estaba fóra.

-¿E o nivel de vendas?

-Non nos podemos queixar. Hai días mellores que outros e o momento é malo, pero axuda o feito de que aquí hai cousas todos os días difíciles de atopar a diario, por exemplo o plátano maduro para fritir, moi consumido, por exemplo, polos dominicanos.