A unitaria de Estorde foi un agasallo da emigración

Na comarca os filántropos non foron só emigrantes individuais que quixeron demostrar dalgún modo o agarimo aos seus lugares de nacemento coa súa fortuna.

Houbo tamén entidades da emigración que empregaron fondos propios para axudar ao desenvolvemento da súa terra. Unha delas foi a asociación ABC de Corcubión. Unha entidade fincada en Arxentina e unha das que aglutinou a maior número de emigrantes, non só de Corcubión, senón tamén doutros municipios da contorna, como o de Fisterra.

Entre outras cousas, doou fondos para a construción dunha unitaria en Estorde (Cee). O edificio quedou en desuso hai décadas e foi recuperado polo Concello de Cee no 2003 para o uso dos veciños da parroquia.