A Asociación de Centros Homologados, entidade para a promoción da calidade na formación na que están integrados os principais centros do Grupo Academia Postal, será a encargada de pór en práctica un programa de sensibilización no ámbito da violencia de xénero dirixido á poboación inmigrante residente en Galicia e impulsado pola secretaria xeral de Igualdade e a secretaria xeral de Emigración da Xunta. O obxectivo do proxecto é o de conseguir que a cidadanía que forma parte da comunidade inmigrante dispoña dos recursos sociais e a información necesaria para actuar fronte a un caso de violencia de xénero, sexan vítimas ou testemuñas dos feitos. Ademais, daráselles a coñecer a lexislación vixente así como os lugares aos que hai que acudir tras coñecer un caso de violencia contra a muller. As xornadas terán formato de taller cunha duración de catro horas e están pensadas para grupos de entre 15 e 20 persoas. As actividades levarán a cabo ata o 18 de decembro.