O Goberno de Feijóo impulsará agora a fusión de centros galegos no exterior

O Goberno de Feijóo impulsará agora a fusión de centros galegos no exterior
Exporalles a necesidade de unirse durante ao Consello de Comunidades que se reunirá en Montevideo

Juan Tallón - OURENSE - 30-11-2009
Son tempos de fusións. Ao debate sobre a das caixas de aforro, en breve engadirase o dos centros galegos no exterior. O Goberno de Feijóo exporá esta vía durante o Consello de Comunidades Galegas, a celebrar en decembro.


Núñez Feijóo, durante unha vista en marzo ao Fogar Español de Anciáns, en Montevideo. (Foto: Arquivo)

De súpeto, tambores de fusión retumban tamén na emigración. Primeiro soaron á mantenta das caixas de aforro. Agora, con míraa posta nas entidades asociativas no exterior. A filosofía, para xustificar as anexións, é a mesma: adaptar as estruturas organizativas e as estratexias para saír vivos aos retos da globalización. O Goberno de Alberto Núñez Feijóo entende que hai que reducir o número de centros galegos, aínda que o Censo de Cidadáns Españois no Exterior non deixa de crecer. Só en Ourense, a comezos de 2009, había 77.250 cidadáns inscritos. No conxunto de Galicia 334.330. E subindo.

A inminente celebración, entre os días 7 e 8 de decembro, do IX Consello de Comunidades Galegas, órgano representativo dos centros asentados fóra da comunidade, con carácter deliberante e funcións consultivas, será o escenario elixido polo Goberno do PP para transmitir á emigración galega a noticia: é necesario introducir recortes na filosofía de vida do asociacionismo. Sobre a Secretaría xeral de Emigración, baixo a titularidade do ourensán Santiago Camba, recae a organización do Consello de Comunidades, que nesta edición trasládase a Uruguai. Alí exporanse catro relatorios para que ser debatidas entre as máis de 150 persoas que conforman o Consello, e no que estarán representados numerosos centros de orixe ourensá. A chicha concéntrase no relatorio titulado "Galeguidade".

É "esencial abordar con sentido de pobo -recolle o texto marco- as políticas necesarias que fomenten a unión dos esforzos das entidades galegas no exterior". Moitas "sociedades abordan con dificultade o sostemento das súas infraestruturas, o fomento de actividades ou o mantemento dun número suficiente de asociados". Unha parte das entidades, segundo advirte o relatorio elaborado pola Xunta, "só sobreviven polo empeño persoal e a dedicación altruísta dalgúns dos seus socios e polo apoio económico da administración de Galicia". E engádese: "O futuro destas sociedades, sen un cambio de rumbo claro e definido cara á eficiencia, está por desgraza, sinalado".



Integración natural

O Goberno Feijóo reclama xenerosidade e solidariedade nas entidades para propiciar a integración dunhas noutras. Para iso, mira ao pasado: "Debemos continuar co camiño marcado historicamente polas nosas sociedades, que, dunha forma natural, superieron integrarse en entidades maiores, das sociedades parroquiais ás municipais e comarcais, e de alí ás provinciais ata chegar a entidades que sumaban esforzos dos galegos de todas as provincias". O Goberno, que non ignora a reticencia dalgúns centros a perder a súa identidade, apela a ser "bos e xenerosos", e entender que "unidos somos máis fortes". É relevante ter en conta que a día existen en todo o mundo máis de 200 entidades galegas das que a Secretaría de Emigración ten constancia, e as que nunha medida ou outra axuda a financiar. O relatorio, nos termos cos que se presentará en Uruguai, garante polémica.

Desprazamentos cun custo de 134.500 euros

O Consello de Comunidades Galegas, que se reúne con carácter trianual, implica un alto esforzo a nivel organizativo, maior dependendo da cidade na que se convoque. Na súa novena edición, o Goberno de Núñez Feijóo elixiu Montevideo. Ata alí haberán de desprazarse polo menos un representante por cada unha das 150 entidades galegas no exterior que se integran no Consello. Ao que hai que sumar un mínimo de 20 persoas pertencentes á Secretaría de Emigración e outros organismos. Só para sufragar os desprazamentos desde o lugar de orixe (América e Europa) a Montevideo, Emigración gastarase 134.500 euros, tras outorgar a Viaxes Atlántico en procedemento aberto e tramitación ordinaria este labor. Nun orzamento a parte haberá que consignar aqueles gastos que xeren as estancias durante polo menos tres días de todos os participantes e organizadores, así como os custos asociados á intendencia dun evento destas características.

O Consello de Comunidades Galegas estará precedido nun día da convocatoria da Comisión Delegada, órgano permanente que se reúne entre consellos, polo menos unha vez ao ano.