O Programa estructúrase en tres primeiras xornadas- 27, 28 e 29 de novembro- que terán continuidade on line a través da plataforma galiciaaberta.com
As xornadas buscan formar en habilidades directivas da máxima calidade á mocidade do exterior para que as comunidades galegas poidan contar con mozos preparados en formas innovadoras e máis eficaces de actuación, liderazgo e negociación
Ao longo destes días os mozos descendentes- que contarán coa participación de persoas significativas coñecedoras da realidade dos centros galegos e especialistas en habilidades directivas- crearán sinerxias entre eles, interactuando e potenciando o traballo en equipo
Buenos Aires, 26 de novembro de 2009.- A Secretaría Xeral da Emigración, en colaboración coa Universidade de Vigo pon en marcha durantes esta fin de semana o I Programa de Adestramento Directivo para mozos líderes da emigración galega do área da Plata- Arxentina e Uruguai-.
As xornadas- que se abrirán mañá venres, 27 de novembro- buscan formar en habilidades directivas da máxima calidade á mocidade do exterior para que as comunidades galegas poidan contar con mozos preparados en formas innovadoras e máis eficaces de actuación, liderazgo e negociación.
Coa aportación de novas ideas e coñecementos- que fortalezan o cooperativismo galego da emigración- e a posta en común de obxectivos búscase crear actores dunha cultura innovadora que introduzan o xermolo do cambio nas entidades e centros galegos.
As sesións, de sete horas de duración, estructuraranse en tres primeiras xornadas- 27, 28 e 29 de novembro- orientadas á adquisición de coñecementos e nas que se contempla unha xornada de outdoor training ao aire libre. O módulo completaranse con outras dúas sesións ou xornadas de experiencias- 4 e 18 de decembro- nas que se inclúen prácticas para integrar os conceptos ensinados. Finalmente hai previstos dous talleres de reforzo a distancia, coa utilización da plataforma Galicia Aberta- 11 e 22 de decembro-
Ao longo destes días os mozos descendentes- que contarán coa participación de persoas significativas coñecedoras da realidade dos centros galegos e especialistas en habilidades directivas- crearán sinerxias entre eles, interactuando e potenciando o traballo en equipo e a motivación para trazar estratexias que aportar ao movemiento asociativo da comunidade galega e estructurar procesos de xestión innovadores para as organizacións.
A idea última é que as xornadas sexan autoxestionadas por eles mesmos- o capital humano actual e futuro das comunidades e da sociedade-.
Lugar de celebración
NH City & Tower
Bolivar, 160. C1066 Buenos Aires (Arxentina)
- Inicio de programa: venres, 27 de novembro, ás 18:00 horas.
