O Concello de Ferrol estreará esta tarde o programa para reforzar a alfabetización de inmigrantes a través de cancións de música pop. A primeira das sesións levará a cabo ás 18.00 horas no Ateneo Ferrolán, cunha duración de tres horas. Haberá novas sesións mañá e o mércores e outras tres a próxima semana.

O taller Cantar e divertirse xuntos para unha alfabetointegración está dirixido a maiores e nenos desde os oito anos, co obxectivo de axudar a mellorar o uso da lingua e favorecer a convivencia e a integración. O programa estará dirixido polo músico búlgaro Yanko Dimov Yankov, con dezaseis anos de experiencia e diplomado en Maxisterio na especialidade de música, cuxo título está homologado en España. Residente en Ferrol desde o ano 2002, é trompetista, mediador intercultural e animador sociocultural, coa súa vida laboral certificada de forma oficial.

O límite de prazas para participar no programa é de 15. A inscrición pode realizarse na oficina de inmigración, situada no Edificio Social da rúa Sánchez Barcáiztegui ou a través do teléfono 981 944 230. O prazo manterase aberto ata completar a cota.