A Secretaría Xeral da Emigración  publica hoxe na súa páxina web os listados definitivos de solicitudes admitidas e excluídas no programa “Conecta co Xacobeo” deste ano e que ten como obxectivo facilitar que 250 persoas vinculadas ás entidades galegas do exterior percorran na segunda quincena de outubro o Camiño de Santiago.

Este programa, que se desenvolveu por primeira vez o ano pasado, ten como obxectivo promover os lazos con Galicia e coa súa cultura a través do Camiño de Santiago das persoas vinculadas ás entidades galegas que existen tanto no resto das comunidades autónomas españolas, como nos países europeos e americanos, e que, unha vez vivida a experiencia, colaboren como axentes activas e activos na promoción e difusión do Camiño de Santiago e do fenómeno do Ano Santo Xacobeo nos lugares nos que os centros teñen a súa sede.

En total, convócanse 250 prazas, podendo participar nesta convocatoria as persoas  de entre 18 e 64 anos vinculadas ás entidades galegas inscritas no Rexistro da Galeguidade. O próximo luns, día 12 de setembro, terá lugar o sorteo de prazas ao superarse o número de solicitudes presentadas. 

A iniciativa desenvolverase do 22 ao 30 de outubro. As e os participantes percorrerán os últimos 100 quilómetros do Camiño de Santiago en diferentes etapas durante as que se realizará un achegamento ao patrimonio cultural e natural das respectivas zonas do traxecto.