(04/07/2022)
Pazos rende homenaxe á emigración do municipio na Festa dos Remedios
O acto celébrase hoxe coa animación musical do grupo Coribantes de Buchabade
A. Pinacho
Pazos de Borbén |
Andrés Iglesias e Eloisa Nogueira non monumento ao emigrante. // FdV
O Concello de Pazos de Borbén renderá unha homenaxe ás familias de emigrantes do municipio cun concerto hoxe, ás 20.00 horas, durante a celebración tradicional da Festa dos Remedios no Adro de Moscoso.
O alcalde, Andrés Iglesias, e a tenente de alcalde, Eloisa Nogueira, presentaron o evento xunto ao monumento ao emigrante, situado na parroquia de Moscoso, en representación “dos que tanto loitaron fóra da súa terra pero que nunca esqueceron as súas raíces e sempre levaron con orgullo o nome de Pazos de Borbén”, destacou o alcalde. Pola súa banda, Nogueira indicou que “se escolleu a celebración dos Remedios coincidindo co tradicional retorno dos emigrantes para gozar desta festividade xunto ás súas familias”.
A poboación de Pazos sufriu durante o século XX unha forte emigración a Sudamérica, sobre todo a Brasil, e o propio Concello creou hai dous anos un Roteiro da Emigración, un traxecto a través das casas indianas da parroquia de Xunqueiras.
Durante o acto de homenaxe poñerase en valor a importancia do traballo destes veciños na historia do municipio cun recoñecemento público que finalizará coa animación musical do grupo Os Coribantes de Buchabade, que interpretará varios temas tradicionais.
OBXECTIVOS | INTEGRACIÓN | FERRAMENTAS | LEXISLACIÓN | ORGANISMOS | NOVAS | CONTACTO
(c) 2009 FEGAMP, Federación Galega de Municipios e Provincias :: Texto legal
inmigracion@fegamp.es
Desarrolo: AVA Soluciones Tecnológicas