O concelleiro de Benestar Social, Marcos Rei, asistiu este xoves na Casa Azul á primeira xornada do programa de formación para o emprego e a inserción laboral "Reinvéntate e Traballa", no que o departamento municipal colabora coa Asociación de Venezolanos de Pontevedra (Asovedra) e a Federación Venezolana de Galicia (Fevega). Un nutrido grupo de persoas participou desta sesión inaugural do proxecto, desenvolvido a través da empresa Starnaliza, que se organizou co fin de realizar un cribado previo á implementación das aulas de capacitación, mediante a recepción e análise dos currículos dos interesados.
O edil transmitiu "forza, tesón e paciencia" aos asistentes, aos que traslada "o apoio da Concellería de Benestar Social para todo o que necesiten". Rei afirma que "este programa pretende facilitar a formación gratuíta en en a industria alimentaria" e está destinado non só a colectivos de inmigrantes e retornados de diferentes nacionalidades, senón tamén a españois.
De feito, tamén hai moitas persoas de nacionalidade española inscritas. Aínda que o obxectivo inicial é conseguir o emprego dunhas 130 persoas, a medida que avance podería ampliarse substancialmente, chegando mesmo a un compromiso de emprego dunhas 350 persoas. Ademais, "dáse prioridade a aqueles cidadáns que levan máis tempo como usuarios dos Servizos Sociais”, sinalou Marcos Rei.
