A derrogación do voto rogado será aprobada polo Congreso a próxima semana

(27/05/2022)

A derrogación do voto rogado será aprobada polo Congreso a próxima semana





A Rexión Internacional
Almudena Iglesias  27/05/2022

Axencia EFE


O Congreso aprobará a próxima semana a derrogación do voto rogado que ata o de agora debían pedir os españois residentes no estranxeiro, polo que nas próximas eleccións xerais estes electores recibirán a documentación de oficio e terán a opción de descargarse as papeletas de forma telemática.

O ditame da proposición de Lei Orgánica que propón reformar o voto dos residentes no estranxeiro foi aprobado este mércores pola subcomisión que analiza a reforma da LOREG e recibiu os votos favorables de todos os partidos, excepto ERC, a Cup e EH Bildu que se abstiveron.

Os independentistas cataláns solicitaran a delegación do voto ou o voto electrónico pero despois de que estas emendas foron rexeitadas decidiron absterse porque a lei non recolle o "espírito" das súas propostas.

Neste sentido, todas as emendas de ERC, de JxCAT, do PDeCAT e da Cup mantivéronse vivas para o seu debate e votación no pleno da próxima semana, onde a proposición de Lei será con toda probabilidade aprobada por maioría para que siga a súa tramitación no Senado.

A nova reforma do voto dos residentes españois no estranxeiro suprime o requisito de ter que rogar ou solicitar o voto, o que permitirá que "todos reciban a documentación de oficio no seu domicilio", sinala o texto do ditame ao que tivo acceso Efe.

Ademais como novidade contémplase o uso opcional dunha papeleta que poderá descargarse telemáticamente, aínda que para garantir o secreto do voto, só poderá efectuarse a descarga telemática do xogo completo de papeletas.

Trátase de axilizar e facilitar o voto dos españois no estranxeiro despois de que a reforma de 2011 que implantou o voto rogado frease a participación electoral.

Neste sentido ademais de habilitarse embaixadas, consulados honorarios, con horarios de mañá e tarde, e poderse utilizar a valixa diplomática para facer chegar o voto a tempo, os partidos políticos coincidiron en ampliar diferentes prazos.

Así se amplía de tres a sete días os prazos para o depósito do voto en urna e atrásase de tres a cinco días o prazo do escrutinio e de apertura de votos emitidos.

"Danse garantías xurídicas para minimizar a fraude de lei", dixo a deputada do PSOE, Ana Belén Fernández, durante o seu debate en comisión, mentres que a deputada de Unidas Podemos, Martina Velarde, celebrou que a lei acabe cun "cadeado antidemocrático que impedía exercer o dereito a voto como teñen os residentes en España".

"Os dereitos non se rogan senón que se exercen con dignidade", indicou Velarde á vez que tamén o PP, Vox e Cidadáns valoraron o elevado consenso político para pechar unha lei que mellora a actual.

Os socialistas xustificaron que non se incorporou as emendas que pedían o voto telemático ou a delegación do voto por non ter garantías xurídicas e ir en contra da normativa vixente, e aínda que finalmente os partidos independentistas abstivéronse incidiron en que seguirán "loitando para garantir mellores condicións do voto no exterior".

"Non podemos admitir emendas sobre voto electrónico porque o propio Centro Criptológico Nacional desaconsella este sistema porque ten moitos riscos", incidiu tamén o deputado do PP, José Antonio Bermúdez de Castro.

A proposición de Lei Orgánica tamén contempla que os consulados garantan os medios informáticos necesarios para a descarga do resto da documentación precisa para votar, o proceso de precintado, reconto e elaboración da acta sexa público.

Ademais, as funcións dos representantes das candidaturas concorrentes nos procesos electorais no exterior asimilaranse ás funcións de interventores e apoderados nos artigos 76 a 79 da LOREG.

Por outra banda, #ante situacións excepcionais que se poidan dar nalgúns países onde votar sexa máis complicado, o Goberno, previo informe favorable da Xunta Electoral Central (JEC), poderá modular os criterios de votación ou mesmo o proceso para garantir que os residentes españois poidan exercer o seu dereito de sufraxio.

Por outra banda, tras a entrada en vigor da lei, o Goberno ten un prazo de doce meses para adoptar mediante un Real Decreto e previo informe favorable da Xunta Electoral, medidas necesarias para complementar ou substituír, de maneira progresiva e segundo circunstancias concretas dos países, os envíos postais por un envío telemático que reúna as garantías previstas na lexislación electoral.

Tamén podería adoptar outros mecanismos alternativos para aqueles electores que non dispoñan de medios telemáticos propios.

Outra das disposicións sinala que o Goberno revisará o Censo de Españois Residentes Ausentes (CERA) cada cinco anos como mínimo.