(18/03/2022)
LALÍN / LA VOZ
17 mares 2022 .
Sete das familias de refuxiados ucraínos que chegaron este pasado domingo a Lalín, aloxadas de forma provisional no albergue xuvenil de Mouriscade, xa se recolocaron nos pisos do Concello no antigo Manuel Rivero e nos fogares cedidos por veciños. Restan tan só por darlles un novo fogar a tres familias, coa pretensión de completar este proceso durante o que resta de semana. A comisión municipal específica creada para a acollida de persoas procedentes de Ucraína mantivo onte unha reunión de seguimento onde se analizou a situación dos refuxiados e os trámites que se están desenvolvendo para axilizar a súa integración na vida diaria local.
Outra liña de traballo da comisión que preside a tenente de alcalde e concelleira de Política Social, Paz Pérez, incide na escolarización dos nenos ucraínos en idade de ir ao colexio ou instituto. Agardan que en breve se poida remitir a listaxe cos seus nomes e idades á Consellería de Educación para que proceda á asignación de centro e que poidan acudir a clases, activándose os protocolos fixados por este departamento autonómico para atender a uns nenos que descoñecen o idioma.
Destacaron que a colaboración nestes momentos de todos os interesados en realizala a través de doazóns poden canalizarse na sede do Mencer, na rúa Manuel Rivero, no caso de produtos de alimentación, de hixiene ou de limpeza, mentres que a roupa se pode levar ao Faiado Municipal, na rúa Memorias dun Neno Labrego. No caso de querer entregarse mobles ou enxoval do fogar hai que contactar coa o educadora social, eva.prieto@lalin.gal para coordinar as entregas ou os outros dous colectivos. Se a achega é económica, poden facelo na conta do Mencer co concepto Axuda Ucraína: É16 0049 4989 1824 9552 3674.
Compras desde o Concello
Sen deixar a actualidade ao redor da acollida a refuxiados ucraínos, na reunión da xunta de goberno local da pasada semana, cuxa acta se coñecía onte, figura a contratación coa empresa Pontevicius, por 4.000 euros, de alimentos perecedoiros, produtos hixiénicos e de puericultura para este colectivo. Ademais aprobouse a autorización para que se utilice de forma temporal o albergue municipal Vicente Agulló de Mouriscade para acoller a esas familias procedentes de Ucraína.
OBXECTIVOS | INTEGRACIÓN | FERRAMENTAS | LEXISLACIÓN | ORGANISMOS | NOVAS | CONTACTO
(c) 2009 FEGAMP, Federación Galega de Municipios e Provincias :: Texto legal
inmigracion@fegamp.es
Desarrolo: AVA Soluciones Tecnológicas