O Concello aposta pola atención ás persoas desprazadas procedentes de Ucraína seguindo as indicacións e directrices das institucións oficiais que teñen a experiencia e os medios para prestar unha atención adecuada e profesional ás persoas refuxiadas. No entanto, a través do colectivo Doazóns A Estrada o Concello tivo coñecemento da posible chegada ao municipio nos próximos días de novos refuxiados que aínda non teñen garantido aloxamento. Calcúlase que entre hoxe e o luns poderían chegar á Estrada outras 16 persoas. O Concello porá á súa disposición o albergue de Sabucedo como forma de aloxamento provisional mentres non se atopen outras vivendas de acollida. O Concello iniciará de inmediato a posta a punto do albergue, que por causa do covid leva dous anos sen uso. Limparase a fondo e faranse pequenos traballos de pintado e posta a punto. Instalarase tamén wifi. O albergue dispón de 23 camas, cociña, salón, sala de estar, lavadora, calefacción e auga quente.