(08/03/2022)
SANTIAGO / LA VOZ
07 mares 2022 .
A riada de solidariedade de Galicia con Ucraína continúa. Da empresa Rey Procesos de Fundición de Vilagarcía partían este luns as primeiras 20 toneladas de axuda humanitaria cara á fronteira polaca con aquel país, para ser logo distribuídas en Ucraína a miles e miles de desprazados. A firma Benito Abalo unirase cun bus en próximos días. O material foi recollido en toda a comunidade (Monbus colaborou para levalo de Lugo a Vilagarcía), en campañas que se multiplican por toda Galicia, da Costa da Morte á Mariña, ou a que deu a coñecer este luns UGT-Galicia en Santiago.
UGT e CC. OO. convocan paros de 5 minutos en todos os centros de traballo mañá ao mediodía. O secretario xeral de UGT-Galicia, José Antonio Gómez, mostrou a solidariedade con Ucraína e tamén co pobo ruso, reprimido por Putin. O sindicato contactará con empresas de loxística para enviar todo o material e con entidades no destino para distribuílo.
O director xeral de Relacións Exteriores e coa UE, Jesús Gamallo, reuniuse este luns co presidente da Fegamp, Alberto Varela, e representantes de oenegués para coordinar a resposta á crise humanitaria de Ucraína. Gamallo insistiu en que as achegas económicas son a mellor vía para axudar. A Xunta achegou 400.000 euros no marco do convenio entre administracións autonómicas e Goberno español, que se destinarán a Cruz Vermella en Polonia, Romanía e Moldavia. Doutra parte, realizará unha convocatoria pública en próximos días por outros 400.000 euros para proxectos en favor de Ucraína de organizacións galegas. Ao tempo, activou o convenio con Farmamundi, con 10.000 euros de inmediato para a compra de medicamentos; e tamén con Unicef, con cantidade por fixar.
O presidente da Fegamp, Alberto Varela, subliñou a necesidade de coordinación, para o que se creou unha comisión que manterá reunións periódicas. Dixo que os concellos dispoñen xa de preto de 900 prazas en vivendas para acoller refuxiados, ás que se suman outras en temporais en pavillóns e as múltiples ofertas de particulares.
|
OBXECTIVOS | INTEGRACIÓN | FERRAMENTAS | LEXISLACIÓN | ORGANISMOS | NOVAS | CONTACTO
(c) 2009 FEGAMP, Federación Galega de Municipios e Provincias :: Texto legal
inmigracion@fegamp.es
Desarrolo: AVA Soluciones Tecnológicas