IRENE MARTÍN

 

«Vimos fuxindo do país, vimos unha oportunidade e saímos». Así o contan na sede Cáritas Interparroquial de Santiago Óscar Ruiz e Karina Padriño, matrimonio venezolano con tres fillos adolescentes, tras descartar unha emigración a Colombia ou Brasil, onde as fronteiras están «militarizadas» e dedícanse á extorsión. «Tratamos de colocarnos en Madrid, onde chegamos o 29 de decembro, pero dixéronnos que en Galicia había unha comunidade venezolana numerosa, e iso estimulounos a vir para acá», segundo relata Óscar, enxeñeiro electrónico experto en procesos relacionados co petróleo e o gas. Ao chegar a Santiago, dirixíronse ao albergue Xoán XXIII, pero alí non poden durmir os rapaces, así que percorreron varias pensións coa axuda de Cáritas. «Tratamos de manternos sempre xuntos», sinala a parella criolla.

Incerteza e angustia constantes. «Alí non había futuro para os nosos fillos, nin sequera para nós. Os nosos fillos merecen vivir en liberdade e coa alimentación adecuada. Cada día pensabamos que iamos comer. E con medo na casa a que nos entrasen a roubar, porque hai moita inseguridade. A vida non vale nada en Venezuela », segundo expresa Karina, que milita en Acción Democrática, partido opositor ao réxime de Maduro. «Amedrentábannos nas mesas electorais para manipular os votos. Por iso queremos que os nosos fillos vivan en liberdade, sen adoutrinamento, e que teñan unha alimentación adecuada, un seguro médico…», insiste, emocionada. Din que ata outubro non lles deron cita para solicitar o asilo en España.

«A pobreza ten moitas caras, e esta realidade coa que nos estamos atopando é unha máis. É unha situación dramática, porque hai menores, e temos serios problemas para poder atender adecuadamente estes casos. Estamos excedidos. O bo nome de Cáritas favorece, sin duda, que recibamos doazóns de particulares, ademais das axudas oficiais; pero talvez é un bo momento para invitar os veciños da cidade a que se fagan socios, achegando unha pequena cantidade», tal como indica o director da Interparroquial, Luis Calviño.