(02/02/2022)
Santiago de Compostela, 2 de febreiro de 2022.
O secretario xeral da Emigración, Antonio Rodríguez Miranda, presidiu as dúas videoconferencias que se realizaron nas últimas horas con preto de 150 membros das entidades de España, Europa e América para informarlles sobre a nova liña de axudas, publicada o pasado 28 de xaneiro, destinada á conservación do patrimonio, mellora de equipamentos e reforma de instalacións destes centros. Na reunión tamén estivo presente a subdirectora xeral de Relacións coas Comunidades Galegas, Isabel Martínez Pellicer.
Tal e como se lle explicou ás e aos responsables das entidades galegas do exterior, publicouse recentemente no DOG esta convocatoria, que contará cun crédito orzamentario de 575.000 euros e que se destinará á conservación do patrimonio, mellora de equipamentos e reforma das instalacións.
Novamente este ano poderanse acoller a esta liña de axudas todas as entidades, sen diferencia pola súa tipoloxía.
Tamén mantense nesta convocatoria a inclusión dunha liña de axudas para que as entidades poidan adquirir aplicacións informáticas de xestión para a súa dixitalización, facilitando así, por unha banda, a relación coa Administración en relación á presentación e xustificación de subvencións, así como co Rexistro de Comunidades Galegas, o que permitirá que teñan actualizada toda a súa documentación.
O prazo de presentación de solicitudes será dun mes, ata o próximo 28 de febreiro, e as entidades poderán solicitar ata o 80% do investimento total. En concreto, os demandantes poderán solicitar axudas para obras, reforma de instalacións, conservación do patrimonio cultural e mellora de dotacións e equipamentos de carácter inventariable.
Os centros interesados poden tamén informarse a través desta ligazón.
OBXECTIVOS | INTEGRACIÓN | FERRAMENTAS | LEXISLACIÓN | ORGANISMOS | NOVAS | CONTACTO
(c) 2009 FEGAMP, Federación Galega de Municipios e Provincias :: Texto legal
inmigracion@fegamp.es
Desarrolo: AVA Soluciones Tecnológicas