(21/01/2022)
Escrivá: “A inmigración é esencial para a produción de coñecemento e o reforzo do capital humano”
Ministerio de Inclusión, Seguridade Social e Migracións
21/01/2022
O ministro de Inclusión inaugura a reunión constituínte do novo Foro para a Integración Social dos inmigrantes
O ministro de Inclusión, Seguridade Social e Migracións inaugurou esta mañá a reunión constituínte do Foro para a Integración Social dos Inmigrantes no seu mandato de 2022. José Luis Escrivá, que interveu telemáticamente, estaba acompañado do Secretario de Estado de Migracións, Jesús Perea, e da nova presidenta do Foro, Ángeles Solanes Corella.
Escrivá puxo en valor o papel “fundamental que o Foro para a Integración Social dos Inmigrantes ten á hora de acompañar á administración en todos os desafíos estruturais aos que nos enfrontamos en materia de migración”. O ministro lembrou algunhas das medidas impulsadas para mellorar a vida das persoas migrantes, como a modificación do Regulamento de Estranxeiría, o fortalecemento do Sistema de Acollida ou o despregamento posto en marcha no marco da evacuación de refuxiados afgáns.
“A inmigración é esencial para a produción de coñecemento e o reforzo do capital humano; para o dinamismo social e cultural; e para a consolidación dos valores democráticos”, afirmou o ministro, lembrando que os “coñecementos, experiencias e capacidade de resiliencia das persoas migrantes demostran que tamén deben ser actores centrais nas políticas implementadas neste período de recuperación”.
Tras a inauguración do ministro e ao longo da mañá, participaron os vogais designados correspondentes ás entidades seleccionadas para cubrir as vogalías do Foro para a Integración Social dos Inmigrantes en representación das asociacións de inmigrantes e refuxiados, e das organizacións sociais de apoio.
O Foro para a Integración Social dos Inmigrantes nace en 1994 como un dos instrumentos do Plan Estratéxico de Cidadanía e Integración (PECI), configurándose como o órgano adecuado para recoller as demandas da poboación inmigrante e co obxectivo de servir de leito para a participación e o diálogo, implicando a toda a sociedade.
O foro é un órgano colexiado, incardinado na Secretaría de Estado de Migracións, que se reúne en Pleno e Comisións, podendo constituír, ademais, grupos de traballo ad hoc para o estudo de determinadas cuestións.
Entre as súas principais misións, encárgase de elaborar propostas e recomendacións tendentes a promover a integración dos inmigrantes e refuxiados, ou da asistencia e participación en organismos e entidades nacionais e internacionais cuxa actividade teña incidencia na integración das persoas inmigrantes e refuxiadas.
O pasado 30 de novembro publicouse a Orde ISM/1429/2021, do 13 de decembro, pola que se designan as entidades seleccionadas para cubrir as vogalías do Foro para a Integración Social dos Inmigrantes en representación das asociacións de inmigrantes e refuxiados e das organizacións sociais de apoio.
|
OBXECTIVOS | INTEGRACIÓN | FERRAMENTAS | LEXISLACIÓN | ORGANISMOS | NOVAS | CONTACTO
(c) 2009 FEGAMP, Federación Galega de Municipios e Provincias :: Texto legal
inmigracion@fegamp.es
Desarrolo: AVA Soluciones Tecnológicas