O presidente da Xunta Electoral Central asistirá á subcomisión que estuda a eliminación do voto rogado o xoves 13

(11/01/2022)

O presidente da Xunta Electoral Central asistirá á subcomisión que estuda a eliminación do voto rogado o xoves 13


Redacción, Madrid | 9 de xaneiro de 2022, 

O presidente da Xunta Electoral Central (JEC), Miguel Colmenero, comparecerá o vindeiro xoves, día 13, na subcomisión para a reforma da Lei Orgánica do Réxime Electoral Xeral (LOREG), no seo da Comisión Constitucional do Congreso. O presidente da JEC está convocado para informar sobre a regulación do exercicio de voto polos españois que viven no estranxeiro.

Reforzar os medios persoais e materiais dos consulados nos períodos electorais ou atrasar ao quinto día despois da votación o escrutinio das papeletas dos españois residentes no exterior son algunhas das medidas que defende a Xunta Electoral Central fronte ás deficiencias que vén carrexando desde 2011 o coñecido como voto rogado.

Miguel Colmenero comparecerá no Congreso cinco anos despois de que o fixese o seu antecesor no cargo, Carlos Granados, que se presentou ante os deputados da subcomisión en outubro de 2017. Naquela ocasión, o entón presidente da JEC propuxo, como medida excepcional a posta en marcha dun sistema electrónico seguro que axilice os prazos e garanta ese dereito fundamental.

Na súa comparecencia, Granados subliñara que se trataría dun procedemento excepcional, que debería ser regulado por unha lei exclusiva para esta materia, cun amplo consenso e cuxa xestión informática “non debería deixarse en mans privadas”.

Na súa opinión, algo como un dereito fundamental como o da participación na vida política tería que estar baixo o control da propia JEC ou dalgunha outra institución neutral, e sempre con medios suficientes para garantir a seguridade do sistema de voto.