O alcalde da Laracha, José Manuel López Varela, co responsable da Comisión Europea en Croacia, Ognian Zlatev Concello da Laracha

 

As cidades croatas de Zagreb e Gornja Rijeka acollen o cuarto evento do proxecto Strengthening a Europe of solidarity in estafes of migration —Fortalecendo unha Europa solidaria en tempos de migración— iniciativa que lidera o Concello da Laracha e suma 20 socios, entre municipios e entidades, procedentes de 19 países europeos.

Como xa sucedese nas tres citas anteriores, A Laracha, Kaunas (Lituania) e Qrendi (Malta), a temática xira sobre a crise migratoria en Europa e a cooperación «na procura de respostas á mesma desde os valores da integración, o diálogo e a reflexión social», segundo explicou o rexedor en Croacia.

Ao longo da xornada describiuse a realidade sociocultural croata, abordouse a problemática das migracións e, ademais, desde a delegación neerlandesa, que forma parte como socia do programa, analizouse o proxecto de integración de inmigrantes posto en marcha en Almere, cidade situada no centro dos Países Baixos. O encontro concluíu co relato dun doutor libanés, Issam Dbouk, que leva dez anos residindo en Croacia, país ao que chego como refuxiado.

A continuación, a delegación desprazouse ata o consistorio de Zagreb, onde foron recibidos por Josko Klisovic, presidente da asemblea da cidade.