Mostra cedida polo Consello da Cultura Galega, que se inaugurará o domingo no albergue Abeiro do Sor

 

As relacións culturais entre Mañón e Cuba ao redor da emigración e a educación, de finais do século XIX a principios do XX, son o eixo das xornadas organizadas polo Concello mañonés para esta fin de semana. Carlos Espinosa Domínguez, ensaísta cubano experto na vida e a obra de Lino Novás Calvo, disertará sobre o escritor nado en Grañas do Sor hoxe (20.00 horas, no centro sociocomunitario).

E o domingo (13.00) inaugurarase a exposición Luces de alén mar. As escolas de americanos en Galicia, cedida polo Consello da Cultura Galega, no albergue Abeiro do Sor, en Mañón. Intervirán Vicente Pena, comisario da mostra; Bernardo Penabade, docente e exalumno do antigo escolar; e o alcalde, Alfredo Dovale. Para vela outro día hai que enviar unha mensaxe ou chamar ao 617 659 483.