O Concello de Noia contará con dous novos programas de inclusión para inmigrantes

(04/09/2021)

O Concello de Noia contará con dous novos programas de inclusión para inmigrantes

M.G. NOIA

Prestarase asesoramento a persoas procedentes do estranxeiro a través dun convenio coa ONG Senvalos

03 sep 2021 .

O Concello de Noia, a través do departamento de Servizos Sociais, á fronte do que se atopa a edila Marisol Villar, e a ONG Senvalos acaban de asinar un convenio de colaboración que permitirá implantar no municipio programas de inclusión social dirixidos a persoas inmigrantes.

Son dous as iniciativas que se porán en marcha: unha orientada á mediación intercultural e outra dedicada ao asesoramento xurídico técnico en materia de estranxeiría. O primeiro destes programas ten como obxectivo xeral contribuír ao establecemento de relacións de convivencia intercultural entre migrantes e poboación local, favorecer e potenciar a presenza e participación das persoas de orixe foránea na vida social de Noia e mellorar o seu acceso a recursos sociais públicos e privados e facilitar a comunicación.

No que respecta ao apartado xurídico, inclúe, entre outros, servizos gratuítos como asesoramento na tramitación e presentación de recursos, autorizacións de residencia e traballo, visados e reagrupación familiar; apoio na solicitude da nacionalidade, así como nos procedementos de protección internacional, asilo e refuxio; acompañamento nos trámites ante as Administracións; ou derivación á quenda de oficio para asistencia xurídica gratuíta.

Estes e outros servizos estarán a disposición das persoas inmigrantes —especialmente aquelas que se atopen en situación de risco de exclusión social— grazas ao convenio asinado pola edila Marisol Villar e José Francisco Furtado, presidente de Senvalos. En virtude deste acordo, a asistencia prestarase o primeiro e terceiro mércores de cada mes nas oficinas de Servizos Sociais, entre as 10.30 e as 15.00, solicitando cita previa no 981 828 011 ou o correo inclusion.noia@gmail.com.

Novas e Actualidade

Titulares
Histórico

Usuario:
Contrasinal: