As e os participantes percorrerán 100 quilómetros do Camiño en diferentes etapas ata chegar a Santiago de Compostela.
Santiago de Compostela, 29 de xullo de 2021.
As entidades galegas asentadas en España e resto de Europa teñen de prazo ata o vindeiro 2 de agosto para presentar a relación de solicitantes para o programa “Conecta co Xacobeo”.
Esta nova iniciativa da Secretaría Xeral da Emigración bríndalle aos futuros beneficiarios e beneficiarias a oportunidade de percorrer 100 km do Camiño de Santiago en diferentes etapas ata chegar ao km 0 na compostelá Praza do Obradoiro, durante as que non só coñecerán o patrimonio cultural e natural das respectivas zonas polas que vaian pasando, senón que tamén reforzarán os lazos coa súa terra.
En total ofértanse 200 prazas, podendo propoñer candidatas e candidatos nesta convocatoria tódalas entidades galegas inscritas no Rexistro da Galeguidade e as persoas vinculadas a estas de idades entre 18 e 64 anos.
O programa desenvolverase en dúas quendas. Na primeira quenda do 18 ao 26 de setembro participarán as persoas seleccionadas segundo a proposta das entidades galegas asentadas nas comunidades autónomas de España e, unha vez rematada, iniciarán o percorrido as persoas procedentes dos demais países de Europa.
A Secretaría Xeral da Emigración farase cargo da organización da viaxe, dos traslados das e dos participantes e custo dos billetes dende o lugar de residencia destas persoas, así como dos desprazamentos terrestres, aloxamento e manutención en Galicia.