A Secretaría Xeral da Emigración segue a difundir, a través da súa plataforma web "GaliciaAberta", os contidos audiovisuais do Fondo de Proxectos Culturais Xacobeo 2021, co obxectivo de que as galegas e galegos do exterior poidan desfrutar destes contidos musicais, culturais e cinematográficos que lles acerquen máis a Galicia.

Nesta ocasión descubriremos o proxecto de dinamización do patrimonio cultural inmaterial galego no marco da iniciativa Ponte... nas Ondas!, así como os cantares de tradición oral no Camiño Portugués, faremos un percorrido pola paisaxe galega e coñeceremos a Sofía, un espectáculo unipersoal próximo ao teatro-conferencia da actriz Marta Pérez.

No capítulo de Ciencia e historia galega achegámonos ata 25 Pontes, un proxecto de dinamización do patrimonio cultural inmaterial galego a través de pezas interactivas e audiovisuais, así como de posta en valor deste patrimonio no marco da presentación da iniciativa Ponte... nas Ondas!.

En canto as Artes escénicas, destacar a proposta da actriz Marta Pérez Alonso que nos presenta Sofía, un espectáculo unipersoal próximo ao teatro-conferencia no que fai unha reflexión entorno á necesidade de facer un cálculo do que é ou non é violencia machista.

A través do contedor do Xacobeo, podemos coñecer á serie documental Miramemira, composta por 4 capítulos nos que se fai un percorrido pola paisaxe galega e a vida das persoas que a habitan e conforman seguindo o Camiño de Santiago de leste a oeste. Finalmente, en canto a Música, Leni Pérez e Roberto Comesaña interpretan cantares de labor, de lecer, do ciclo anual e romances, todos eles en galego e que se foron recollendo en localidades por onde pasa o Camiño Portugués.

Con esta iniciativa, a Secretaría Xeral da Emigración tenta achegar á nosa colectividade do exterior os contidos creativos de interese cultural e artístico, lingüístico e turístico que forman parte do Fondo de Proxectos Culturais Xacobeo 2021, de cara a promocionar a nosa lingua e cultura entre os galegos do exterior.