O delegado do Goberno, José Miñones, fai un chamamento aos alcaldes para que soliciten o servizo, que evitará desprazamentos aos veciños do rural

05 jul 2021

O DNI 4.0 xa se pode conseguir en Ourense . Este luns o delegado de Goberno en Galicia, José Miñones, presentou na capital das Burgas o novo documento, co que se pode viaxar por toda Europa e que inclúe unha maior seguridade para evitar falsificacións. Na súa visita á comisaría provincial, Miñones adiantou que a expedición do documento de identidade non requirirá un desprazamento para quen vivan fose da capital, xa que unha unidade móbil se desprazará a aqueles municipios que así o soliciten. «A expedición do DNI pódese facer non só nas comisarías, senón tamén a través das unidades móbiles, co obxectivo de chegar a todos os concello e tamén ao rural», explicou o delegado, que enmarcou esta iniciativa dentro das 130 medidas deseñadas a nivel estatal para loitar contra o despoboamento. «Dentro dese plan de reto demográfico, as unidades móbiles trasladaranse aos municipios nos que non haxa comisarías para tramitar os DNI, así como a residencias ou zonas particulares nas que viva xente que non se pode desprazar», dixo o delegado.