O secretario xeral da Emigración, Antonio Rodríguez Miranda, asistiu hoxe ás XIV Xornadas do Peregrino "Abrindo Camiño" celebradas no concello de Mondoñedo baixo o lema "Mondoñedo na Lembranza", onde fixo referencia á emigración do século XX e ao fenómeno do retorno a Galicia que se está a vivir na actualidade.

O secretario xeral participou no descubrimento dunha placa conmemorativa en homenaxe á Emigración no “Parque da Lembranza” xunto a adxunta á valedora do Pobo, María Xosé Porteiro García, e a tenente alcalde do concello, Elena Candia. Tamén se levou a cabo neste lugar a plantación simbólica dunha palmeira.

Antonio Rodríguez Miranda destacou neste acto que “sen o esforzo dos galegos que, no exterior, traballaron en pro da colectividade, moitos dos que fixeron o camiño de ida non tiveran atopado alá outra familia, sentíndose como na casa e mantendo os seus costumes, as súas raíces e a súa lingua e dende alí construíron tamén Galicia. Sen todos eles, moitos dos seus descendentes non poderían estar optando agora por facer o camiño de retorno, un camiño que nós sabemos que non é doado, pero que lles permite elixir a terra dos seus pais e dos seus avós, aportándonos as súas experiencias e coñecementos para facer de Galicia un lugar mellor”. 

Posteriormente, as e os asistentes achegáronse ata o Cemiterio vello onde tivo lugar unha ofrenda floral aos ilustres devanceiros de Mondoñedo: o poeta Manuel Leiras Pulpeiro, o músico Pascual Veiga e ao escritor Álvaro Cunqueiro.

Para conmemorar a festa da árbore, a máis antiga de España, acaecida neste municipio en 1569, plantouse un teixo.

O secretario xeral tamén actuou como moderador na charla-coloquio Lembranza da emigración en América, na que se fixo un recoñecemento a varias e varios persoeiros da emigración como a profesora Andrea López Chao, emigrada a Cuba, e o empresario Francisco García Olano, quen foi presidente do Centro Galego de Bos Aires. Nesta intervención asegurou que “a emigración foi a modernidade para Galicia no século XX e o retorno será o soporte da competitividade no globalizado XXI”.