A conselleira de Política Social, Fabiola García, animou o comercio galego a complementar os beneficios da Tarxeta Benvida con novos descontos para as familias que a presenten. Foi durante un encontro celebrado na Cidade da Cultura con dúas nais beneficiarias desta prestación ao longo dos últimos cinco anos con motivo da presentación do seu novo deseño.

Fabiola García sinalou que durante este tempo esta tarxeta chegou a un total de 70.000 galegas e galegos tanto a través de contías directas, como con descontos adicionais en comercios que se adhiran a ela. Na actualidade son dez os establecementos que ofrecen descontos, polo que convidou aos comercios a que se sumen a esta axuda complementaria.

Así mesmo, lembrou que coa Tarxeta Benvida as familias reciben no primeiro ano 1200 euros, o dobre no caso das familias numerosas, que se poden estender ata os tres anos ou ata os catro no caso dos fogares que máis o precisan. Ademais, para as pequenas e pequenos nacidos no rural, as contías increméntase nun 25% ata chegar aos 3.000 euros ao ano.

Axuda insignia

Desde o 2016 a Tarxeta Benvida contou cun investimento de 176 millóns de euros para acompañar ás galegas e galegos na compra de alimentos infantís, cueiros, roupa, produtos de hixiene e farmacéuticos. Unha das axudas insignia do Goberno galego, xunto coa Caixa Benvida, que agora mudan o seu aspecto con cores azuis e brancas en homenaxe á bandeira galega.

A conselleira puxo en valor a aposta da Xunta polas familias galegas. Neste sentido destacou que, xunto con esta Tarxeta Benvida, poden beneficiarse de vantaxes como a gratuidade das escolas infantís para segundas e segundos fillos e sucesivos; o Bono Concilia para primeiros fillos e fillas, que vén de incrementarse nun 10%; ou o apoio ás familias do rural, con deducións fiscais para a compra de vivenda e a posta en marcha de preto de 80 casas niño en toda Galicia.