España concedeu a nacionalidade por residencia a 80.148 persoas en 2020

(02/06/2021)

España concedeu a nacionalidade por residencia a 80.148 persoas en 2020

Ministerio de Inclusión, Seguridade Social e Migracións

02/06/2021



- Marrocos, Ecuador, Colombia, Bolivia e Venezuela foron en 2020 as cinco principais nacionalidades no volume de concesións de nacionalidade por residencia


- O 49% das 80.148 concesións de nacionalidade española corresponden a mulleres e o 21% a menores de 25 anos


O número de concesións de nacionalidade española por residencia durante 2020 ascende a 80.148, un 51% menos que en 2019, segundo datos publicados polo Observatorio Permanente da Inmigración do Ministerio de Inclusión, Seguridade Social e Migracións. A poboación incluída neste estudo é aquela que durante o pasado ano recibiu unha resolución favorable da Dirección Xeral de Seguridade Xurídica e Fe Pública do Ministerio de Xustiza á súa solicitude de nacionalidade española por residencia.

Os resultados, accesibles na páxina web do Ministerio de Inclusión, Seguridade Social e Migracións,  (https://cutt.ly/xnj99BQ) indican que a idade media dos estranxeiros que obtiveron a nacionalidade é de 37 anos. Ademais, o 49% das 80.148 concesións de nacionalidade española corresponden a mulleres, e o 21% a menores de 25 anos. A caída no número de resolucións con respecto ao período anterior débese fundamentalmente ao menor ritmo de resolución, que se explica á súa vez pola inexistencia, en 2020, dun plan de choque que si existiu en 2019 e que volve estar vixente en 2021.

Marrocos, Ecuador, Colombia, Bolivia e Venezuela foron en 2020 as cinco principais nacionalidades no volume de concesións de nacionalidade por residencia, aínda que os requisitos para a súa concesión, no relativo ao prazo esixido de residencia, varían en función da nacionalidade de orixe do solicitante. En conxunto, os países iberoamericanos, concentraron máis do 40% das concesións, e os marroquís case o 30%.

O 37% do total de nacionalidades concedidas en 2020 producíronse no prazo reducido de dous anos, e os principais países de orixe neste grupo foron Ecuador, Bolivia e Colombia. O 33% das concesións producíronse en virtude do suposto xeral que esixe 10 anos de residencia previa, legal e continuada en España. A principal nacionalidade neste grupo foi a marroquí. Por último, un 26% das persoas que accederon á nacionalidade en 2020 fixérono polo prazo reducido dun ano.

As persoas de Marrocos, Romanía, Arxentina e Nixeria ás que se concedeu a nacionalidade por residencia son de media máis novas que o seu respectivo colectivo de residentes en España. Ademais, as mulleres son máis numerosas entre as concesións de nacionalidade por residencia nas idades dos 20 aos 35, os homes dos 35 aos 60.

O informe acompáñase tamén dunha infografía interactiva na que se pode consultar os nacionalizados por residencia combinando simultaneamente filtros por comunidade autónoma nacionalidade de orixe, segundo sexo e grupo de idade e segundo prazo esixido: https://cutt.ly/2nj3mVF.

Tres requisitos para obter a nacionalidade española

O Código Civil explica no seu artigo 22 que a adquisición de nacionalidade española por residencia esixe que o interesado acredite o cumprimento destes tres requisitos básicos: boa conduta cívica, suficiente grao de integración na sociedade española e residir en España de forma legal e continuada por un prazo de tempo, inmediatamente anterior á solicitude que varía segundo os casos.

O tempo de residencia esixido varía segundo algúns supostos. Para os nados en España; para os que contraesen matrimonio cun español ou española sen separarse; para os fillos ou netos de españois de orixe; para viúvos ou viúvas de española ou español sempre que á morte do cónxuxe non existise separación legal ou de feito; e para os que non exercesen a facultade de optar esíxese un ano. Para os nacionais de orixe de países iberoamericanos, Andorra, Filipinas, Guinea Ecuatorial, Portugal, e sefardíes, dous anos. Para os que obtivesen a condición de refuxiados, cinco anos. Para o resto, dez anos.

Desde o ano 2015, a forma de acreditar o grao suficiente de integración consiste na superación de dúas probas, ambas deseñadas e administradas polo Instituto Cervantes. Por unha banda, a obtención dun diploma español como lingua estranxeira DELE de nivel A2 ou superior; por outra, un exame que valora o coñecemento da Constitución española e da realidade social e cultural española.