A Xunta investirá nos próximos meses 16,2 millóns de euros para apoiar a contratación de 1.800 persoas sen emprego nos concellos galegos a través de tres convocatorias de axudas: a dirixida á contratación de persoas perceptoras da Risga; o programa Aprol Rural, que forma parte da Estratexia Galicia Retorna; e o destinado á realización de obras ou servizos de interese xeral ou social (as dúas últimas convocáronse no DOG o pasado 20 de abril).

O Goberno galego, deste xeito, impulsará o emprego local a través destes tres programas para facer fronte aos efectos que a covid-19 está xerando no mercado de traballo.  

O Aprol Rural contará cun orzamento de 7M€ para a contratación de 600 persoas desempregadas en 290 municipios rurais galegos para a realización de tarefas relacionadas, maioritariamente, coa prevención de incendios nas faixas secundarias definidas pola Lei de prevención e defensa contra os incendios forestais de Galicia. Terán prioridade os concellos fusionados e os emprendedores. Os contratos terán unha duración de 9 meses a tempo completo.

O Diario Oficial de Galicia publica así, dunha banda, as axudas destinadas á contratación de 700 persoas perceptoras da Risga, que contan cun orzamento de 7,7 millóns de euros para dar apoio a 165 concellos ou agrupacións de municipios. O obxectivo é proporcionar aos beneficiarios e beneficiarias a experiencia e práctica profesional necesarias para facilitar a súa inserción laboral a través dun contrato laboral que será subvencionable durante 9 meses.

Por último, o Goberno autonómico inviste 1,5M€ para apoiar en 185 concellos galegos a contratación de 500 persoas sen emprego para a realización de obras ou servizos de interese xeral e social co obxectivo de proporcionarlles experiencia e práctica profesional que permita a súa inserción. Os contratos serán de tres meses -no caso de que sexan a tempo completo- ou de seis meses para os de tempo parcial.

Os dous últimos programas convocáronse no DOG o pasado 20 de abril. Os concellos teñen de prazo ata o 20 de maio para pedir os apoios. 

Estas medidas teñen como obxectivo mellorar a empregabilidade das persoas participantes, así como apoiar a integración laboral de persoas vulnerables co obxectivo de dinamizar o mercado laboral galego. Enmárcanse na Axenda 20 coa que a Xunta pretende crear máis e mellor emprego de calidade na Comunidade e completan outras iniciativas que xa se activaron e que favorecen a contratación nos concellos galegos. É o caso dos obradoiros de emprego, no que se invisten 30,2M€ para permitir a formación e o acceso ao emprego de 1.500 persoas; as axudas para a contratación de orientadores laborais, ás que se destinan 6,8M€ para a contratación de 280 persoas ou os Programas Integrados de Emprego, cun orzamento de 8,4M€ para apoiar a contratación de 3.300 persoas en concellos e entidades sen ánimo de lucro.