Na nova convocatoria, que está aberta ata o 30 de abril, aumentase o número de bolsas ata chegar ás 200 de cara a incentivar a que os galegos e galegas do exterior de alta cualificación fixen a súa residencia e a súa actividade laboral na comunidade autónoma.
As bolsas sufragan viaxe, matrícula, aloxamento e manutención, cunhas contías que oscilan entre os 7.000 e os 11.574 euros.
Antonio Rodríguez Miranda, durante unha das webinares informativas celebradas esta semana
Santiago de Compostela, 3 de abril de 2021.
O secretario xeral da Emigración, Antonio Rodríguez Miranda, presidiu as tres sesións telemáticas realizadas para informar ás e aos universitarios galegos de América e Europa sobre a quinta convocatoria das Bolsas Excelencia Mocidade Exterior (BEME Máster), que este ano contarán con máis prazas dispoñibles e máis dotación económica asignada.
Deste xeito, máis de 220 universitarias e universitarios interesados participaron nestas webinares onde se lles contestou tamén a tódalas súas dubidas en torno á solicitude destas bolsas, que están abertas ata o 30 de abril.
As e os beneficiarios deben ser galegos por nacemento ou descendentes por consanguinidade, acreditar un mínimo de dous anos de residencia no Exterior e estar admitida ou admitido na preinscrición dalgún dos mestrados das universidades galegas. Dende que comezou este programa, en 2017, xa foron 700 as bolsas destinadas a universitarias e universitarios galegos do exterior.
O Goberno galego destina 1,72 millóns de euros impulsando a captación dun total de 200 tituladas e titulados universitarios galegos e de currículo brillante, residentes no estranxeiro e cunha titulación de grao, licenciatura, enxeñaría ou arquitectura, que poderán cursar estudos de mestrado nalgunha das tres universidades galegas.
A Xunta traballa así no retorno de currículos brillantes ao tempo que contribúe á fixación de poboación na Galicia territorial, pasando das 150 bolsas do pasado curso ás 200 para o 2021/22, co fin de axudar no regreso de máis mozas e mozos a Galicia polas dificultades que poidan existir no exterior a consecuencia da covid-19.
A bolsa, cuxo importe é de 7.000 ou 7.650 euros (segundo a persoa beneficiaria proceda de Europa ou do resto do mundo) por curso completo de 60 créditos ECTS, destínase a cubrir os gastos de matrícula, viaxe, aloxamento e manutención na Galicia territorial. Aquelas e aqueles que se matriculen nun curso de maior duración (90 créditos) disporán dun orzamento total de ata 11.475 euros (en función do continente de procedencia do alumno ou alumna).
O obxectivo das BEME é non so atraer cada ano galegas e galegos que viven fóra e que completen aquí a súa formación especializada senón que traballen en Galicia e que fixen tamén no territorio galego definitivamente a súa residencia.
Neste sentido, todos os beneficiarios e beneficiarias destas axudas contarán, un ano máis, cunha orientación laboral coa que se pretende non só captar para Galicia o talento máis brillante de entre os mozos e mozas residentes fóra fomentando o retorno da poboación activa laboral, senón tamén facilitarlles o seu establecemento definitivo na comunidade. A oferta céntrase en estudos con capacidade de absorción no tecido produtivo e laboral galego.
