O PSOE ourensán constata que soben as consultas dos retornados

(29/03/2021)

O PSOE ourensán constata que soben as consultas dos retornados

Durante o 2020 a secretaría provincial de emigración do partido socialista mantivo o servizo de información e asesoramento para o colectivo emigrante

Durante o ano 2020 a secretaría provincial de emigración do PSOE, a pesar das restricións provocadas pola pandemia, conseguiu manter o servizo de información e asesoramento para o colectivo de emigrantes retornados. «O aumento de consultas por teléfono e correo electrónico de diversos puntos de dentro e fóra de España», destaca o socialista Luis Gulín, foi un dos principais fitos que se recolle na memoria de actividades. Ao longo do 2020, e segundo ese informe, a petición máis demandada foi o envío de modelos en alemán para solicitar á Seguridade Social dese país un certificado de ingresos de pensións coas súas respectivas retencións para o seguro médico e seguro de dependencia.

Desde a secretaría resaltan que a decenas de retornados procedentes de Alemaña «conseguíuselles tramitar a exención do pago do 5 % do IRPF sobre a súa pensión xermana ao estar por baixo do limiar dos 9.400 euros anuais de ingresos». Prestouse tamén apoio técnico a decenas de retornados en como tramitar a exención fiscal ante a Axencia Tributaria respecto das pensións de invalidez ou incapacidade estranxeiras. Outra das implicacións deste servizo, explica o seu responsable, Luís Gulín. foi a alertar ás autoridades pertinentes sobre falta de pagamentos e atrasos das pensións complementarias dos fondos de empresas que afectan a centenares de retornados.