Grazas a estes apoios económicos beneficiáronse tanto entidades e particulares no propio país, así como as e os venezolanos retornados a Galicia.
Santiago de Compostela, 16 de marzo de 2021.
O secretario xeral da Emigración, Antonio Rodríguez Miranda, mantivo hoxe unha reunión por videoconferencia cos representantes das entidades galegas en Venezuela para analizar a situación que atravesan nestes intres, así como analizar o impacto que tiveron as axudas procedentes deste departamento durante o ano pasado e valorar as accións a realizar durante o presente 2021.
Na reunión, ademais dos representantes estas entidades, tamén participou o presidente da FECEVE (Federación de Centros Españoles de Venezuela), Roberto González, dado que esta entidade realiza un relevante papel na atención ás cidadás e aos cidadáns españois deste país, pois coordina a xestión dun seguro de atención médica que permite o acceso en condicións económicas máis favorables.
Durante a reunión destacou os máis de 2,7 millóns de euros destinados en 2020, a través das distintas ordes de axudas deste departamento, aos galegos e galegas de Venezuela, tanto a entidades como a persoas individuais, así como ás e aos emigrantes retornados deste país en Galicia, véndose en total beneficiadas máis de 4.000 familias.
Segundo destacou o secretario xeral, a Xunta colabora coas entidades galegas onde existe unha oficina de atención social, o que permite á administración autonómica desenvolver neste país tódolos programas de contido social no que se atende aos galegos e galegas. O 90% das e dos galegos en Venezuela están, deste xeito, asociados a algunha destas entidades, “aínda que as nosas axudas chegan a todos os galegos que o solicitan, sexan ou non membros destas entidades”.
Neste senso, Miranda agradeceu a colaboración da Hermandad Gallega de Venezuela, do Centro Gallego de Maracaibo, da Hermandad Gallega de Valencia e do Centro Gallego de Puerto La Cruz, “xa que sen eles sería difícil poder chegar a toda esta colectividade, apoialos e acompañalos”.
Por outra banda, a administración autonómica tamén colabora de xeito directo coas entidades de Venezuela que traballan exclusivamente no ámbito social, como é o caso da Fundación España e a Fundación Fillos de Ourense.
Grazas ás axudas económicas individuais e de emerxencia social, neste país beneficiáronse un total de 1.500 familias directamente. Estes dous programas son dos que maior relevancia teñen para as galegas e galegos de Venezuela, xa que permiten paliar as necesidades básicas de subsistencia e atención sociosanitaria de quen se atopa nunha situación económica precaria.
Por outra banda, outro dos programas máis importantes co que conta a Secretaría Xeral da Emigración para con Venezuela é o de axuda para medicamentos, que permite que maiores e enfermos crónicos galegos e galegas neste país poidan contar con estas dotacións sanitarias. En 2020, foron 1.300 os medicamentos repartidos con este fin.
Axudas ao retorno
A tódolos apoios anteriores deben sumarse tamén os programas de apoio ás galegas e galegos de Venezuela retornados a Galicia.
Así, cabe destacar os 21 bolseiros e bolseiras BEME, que están a realizar nestes intres un mestrado nunha das tres universidades galegas, e que veñen a sumarse a un total de 105 alumnas e alumnos galegos de Venezuela que cursaron una formación superior grazas a estas bolsas desde o inicio das mesmas en 2017. Estas bolsas de excelencia teñen como obxectivo sufragar parte dos gastos académicos derivados dos estudos como a estadía, o mantemento e a viaxe dos posibles beneficiarios e beneficiarias.
Ademais, tamén víronse beneficiadas e beneficiados en 2020 cunha axuda económica un total de 23 emprendedoras e emprendedores retornados dende ese país, máis de 100 nos últimos anos, co obxectivo de poñer en marcha novos negocios en sectores como o da hostalería, as novas tecnoloxías ou a alimentación.
Finalmente, beneficiáronse 600 familias coas axudas extraordinarias para persoas emigrantes retornadas que teñen coma obxectivo apoiar a quen volve a Galicia nos gastos sobrevidos do seu retorno, especialmente no momento da chegada, que é cando máis dificultades atopan as familias. Todas e todos eles contan co apoio directo e a colaboración individualizada das oficinas de Retorno que se atopan en Lugo, Vigo, Santiago, Ourense e A Coruña.