O novo espazo, que se poderá contemplar na páxina de GaliciaAberta, ofrecerá audiovisuais galegos a través de catro contedores: Xacobeo, ciencia e historia galegas, música e artes escénicas.
Imaxe de "Saberes de muller", un dos vídeos que estarán dispoñibles nesta web a partir do vindeiro 8 de marzo
Santiago de Compostela, 5 de marzo de 2021.
A Secretaría Xeral da Emigración difundirá a través da súa plataforma web (GaliciaAberta – https://emigracion.xunta.gal), a partir do próximo 8 de marzo, un novo espazo dedicado ao Fondo de Proxectos Culturais Xacobeo 2021, co obxectivo de que as galegas e os galegos do exterior poidan desfrutar destes contidos musicais, culturais e cinematográficos que lles acerquen máis a Galicia.
O secretario xeral da Emigración, Antonio Rodríguez Miranda, acompañado do secretario xeral de Política Língüística, Valentín García Gómez, presentarán hoxe, a través de Facebook Live, ás 19 horas (hora española) este novo apartado que fará chegar á nosa colectividade do exterior os contidos creativos de interese cultural e artístico, lingüístico e turístico que forman parte do Fondo de Proxectos Culturais Xacobeo 2021, de cara a promocionar a nosa lingua e cultura entre os galegos e as galegas do exterior.
Deste xeito, a través de catro contedores (Xacobeo, ciencia e historia galegas, música e artes escénicas), cada semana iranse engadindo proxectos deste fondo a este espazo. A iniciativa estrearase o próximo luns, 8 de marzo, co gallo do Día da Muller, engadindo así varios contidos audiovisuais relativos á importancia da figura da muller en Galicia en tódolos eidos da sociedade.
