A cifra de novos rexistrados no CERA en 2020, máis de 40.000, baixa ao nivel dos anos anteriores á crise económica

(19/02/2021)

A cifra de novos rexistrados no CERA en 2020, máis de 40.000, baixa ao nivel dos anos anteriores á crise económica


Crónicas da Emigración

Redacción, Madrid | 18 de febreiro de 2021



O Censo Electoral de Residentes Ausentes (CERA) situouse ao 1 de xaneiro deste ano en 2.182.862 rexistrados, 40.525 máis que na mesma data do ano anterior. A cifra, correspondente aos incorporados en todo 2020, supón a metade dos que se incrementaron en 2016 (80.315) e algo máis dos rexistrados en 2007 e 2008 –anos do estalido da crise económica–, que contabilizaron 39.042 e 36.399 novos rexistrados, respectivamente.

Así queda reflectido nos datos do Instituto Nacional de Estatística (INE), que apunta que as maiores subidas producíronse entre 2010 e 2016, con cifras que roldan e nalgúns casos superan os 100.000 rexistrados (en concreto, 104.120 neste primeiro ano). En 2011, contabilizáronse 99.780; en 2012, 93.343; en 2013; 99.912; en 2014, 97.741; e en 2015, 91.027.

Os datos do último lustro, unha vez superada a crise económica, revelan que foi 2020, ano do coronavirus, o que menos incrementou a lista do CERA. A partir de 2016 as cifras comezan a descender drasticamente e de 80.000 rexistrados ese ano pasouse un ano despois a 57.942. En 2018 contabilizáronse 47.553 novos rexistrados e en 2019 o aumento foi de 57.858.

Os maiores incrementos ao 1 de xaneiro de 2021 con respecto ao ano anterior rexistráronse en Reino Unido e Estados Unidos, con 6.024 e 6.020 novos integrantes da lista, respectivamente. Séguelle Arxentina, con 4.230; Alemaña, con 3.996; Francia (3.925); Suíza (2.647); Cuba (2.186); México (1.641); Bélxica (1.149); e Brasil, con 1.149 novas incorporacións ao censo do exterior. Por baixo do milleiro destacan Italia, con 682; e Chile, con 221.

Pola contra, China, lugar de orixe da pandemia, experimentou unha baixada de 162 españois no CERA, ao pasar dos 3.906 de 2019 a 3.744 a finais de 2020.