A Xunta actuaría sobre edificacións propiedade da administración autonómica ou dos concellos, aínda que tamén está a estudar a opción de destinar parte destes fondos a axudas a particulares para que melloren os seus inmobles.
O obxectivo é atraer poboación, como a das galegas e galegos retornados do exterior, ao rural.
Santiago de Compostela, 5 de febreiro de 2021.
A Secretaria Xeral da Emigración informa da posta en marcha dun programa que permitirá rehabilitar aldeas do rural con acceso a servizos dixitais e que formará parte do Polo para a Transformación de Galicia, un proxecto transversal co que a Xunta pretende captar fondos europeos para o desenvolvemento do rural.
En concreto, a Consellería do Medio Rural pretende destinar estes fondos á rehabilitación de diversos tipos de edificacións en aldeas modelos, facilitando así os servizos dixitais que permitirían atraer e fixar poboación no rural, como é o caso das e dos emigrantes retornados.
Neste caso, esta rehabilitación permitiría que a Xunta actuara sobre edificacións de propiedade autonómica, pero tamén municipal. Ademais, estase a estudar a posibilidade de destinar unha parte destes fondos a axudas para particulares, co fin de que se sumen á rehabilitación e posta en valor destes inmobles.
A Xunta de Galicia dará, iso si, prioridade, ás edificacións que sirvan para dar servizos á poboación ou a revitalización económica destes núcleos rurais, co fin de buscar un ben común para as cidadás e os cidadáns dese entorno.