A Secretaría de Emigración do PSDEG-PSOE de Ourense lembra aos retornados de Alemaña que en xaneiro deben enviar unha fe de vida ao organismo pagador das pensións

(20/01/2021)

A Secretaría de Emigración do PSDEG-PSOE de Ourense lembra aos retornados de Alemaña que en xaneiro deben enviar unha fe de vida ao organismo pagador das pensións



Luís Gulín, secretario de Emigración dos socialistas ourensáns, é o primeiro pola dereita


A Rexión Internacional 19/01/2021

En 2020 houbo atrasos e falta de pagos da pensión privada que segundo afirma o secretario de Emigración do PSDEG-PSOE de Ourense,, Luís Gulín, “débese a que desde o 1º de xaneiro de 2020 as aseguradoras contratadas polas empresas alemás xa non envían un documento de fe de vida”.

O secretario de Emigración dos socialistas ourensáns, Luís Gulín, explica que “no ano 2020 moitos retornados que cobraban esa pensión complementaria estrañáronse que durante meses non se lles abonaba esa pensión privada que adoita ser de cantidades pequenas”. “A razón da falta de pagos e dos atrasos radicaba que desde o 1º de xaneiro de 2020 as aseguradoras contratadas polas empresas alemás xa non envían un documento de fe de vida”, apunta Gulín. Ese papel os retornados normalmente levábano a selar ao concello ou ao Xulgado. Agora cada perceptor da Betriebsrente ten que enviar de oficio e pola súa conta unha fe de vida a Alemaña para poder seguir cobrando esa pensión.

Desde a Secretaría Provincial de Emigración destacan que os retornados “deben consultar coa empresa ou coa aseguradora que abona esa pensión privada a periodicidade do envío da fe de vida, xa que algúns a requiren anualmente e outros cada dous anos”. Namentres, algunhas grandes empresas alemás multinacionais seguen enviando un documento de fe de vida para validar en España.

A Secretaría Provincial de Emigración do PSDEG-PSOE de Ourense ponse ao dispor dos emigrantes retornados de Alemaña para calquera dúbida ou consulta que poden realizar escribindo á seguinte dirección de correo electrónico: cp-ourense@psdeg-psoe.org.