(01/10/2020)
Un estudo revela o perfil do emigrante español: muller, 35 anos, solteira, sen fillos e con estudos
Redacción, Cádiz | 30 de setembro de 2020, Crónicas da Emigración
Investigadores das universidades de Cádiz (UCA) e de Sevilla (US), coordinados por Beltrán Roca, profesor da área de Socioloxía na UCA, e Anastasia Bermúdez, investigadora do Ramón e Cajal no departamento de Antropoloxía Social da US, puxeron en marcha un proxecto que ten como obxectivo analizar a mobilidade dos españois dentro da Unión Europa. O perfil do emigrante español é muller, de 35 anos, solteira, sen fillos e con estudos superiores.
Para iso, este estudo partiu de tres eixos fundamentais: as diferenzas con modelos previos de emigración, a difícil relación traballo-familia nos emigrantes e a súa participación política. Ademais, están a utilizar técnicas tradicionais, como a entrevista cualitativa, a observación participante ou a análise de fontes secundarias, así como outras técnicas máis novas, como a etnografía virtual e a enquisa ‘en liña’.
Desta forma, unha das accións levadas a cabo neste estudo foi a realización dunha enquisa á poboación española en Europa, que puido levarse a cabo grazas á colaboración da empresa, de base tecnolóxica da UCA, ‘Orbistat’. Máis de 1.300 persoas españolas responderon a este cuestionario, residentes en Alemaña, Bélxica e Reino Unido; o que permitiu coñecer aspectos fundamentais da emigración española.
De feito, esta enquisa desvela que a idade media dos emigrantes é de 35 anos aproximadamente, maioritariamente solteiros (55,5%), sen fillos (71,5%) e con estudos superiores (72,9%). Así mesmo, púidose comprobar que a maioría destas persoas levan unha media de 5,7 anos no país, que viven principalmente de aluguer, en parella con ou sen fillos (60,5%) e que o principal motivo para emigrar é obter un emprego mellor ao que atopan en España.
En relación ao sexo, os investigadores indicaron que “as persoas que responderon a esta enquisa son maioritariamente mulleres (771, é dicir un 68%; fronte ao 31,4% que corresponde aos homes). Se se comparan os datos da enquisa co Padrón de Españois Residentes no Estranxeiro (PERE) en Europa en 2019, o número de mulleres é só lixeiramente maior ao de homes. Isto pode significar dúas cousas: que as mulleres teñen maior disposición a participar en enquisas ‘en liña’; ou que a migración feminina ten maior tendencia a levarse a cabo fóra dos rexistros oficiais (o 45% dos enquisados non estaba rexistrado no consulado). Isto último é unha hipótese que temos que comprobar cruzando datos”.
En relación aos vínculos con España, a maioría (74,6%) viaxa ao seu país varias veces ao ano e comunícase a diario (76,7%) con amigos e familiares de España, principalmente a través de mensaxería instantánea. Así mesmo, a enquisa inclúe información acerca da integración social e laboral dos españois nos devanditos países, así como das decisións familiares e a participación política.
Todo este traballo está a realizarse no marco dun proxecto financiado polo Plan Estatal de Fomento da Investigación Científica e Técnica de Excelencia, do Ministerio de Ciencia, Innovación e Universidades. O proxecto, titulado ‘Novas ‘mobilidades’ Intraeuropeas: Decisións sobre o Traballo, a Familia e a Política dos Españois 'transmigrantes’ (referencia CSO2017-84618- P)’, concluirá a finais de 2020.
|
OBXECTIVOS | INTEGRACIÓN | FERRAMENTAS | LEXISLACIÓN | ORGANISMOS | NOVAS | CONTACTO
(c) 2009 FEGAMP, Federación Galega de Municipios e Provincias :: Texto legal
inmigracion@fegamp.es
Desarrolo: AVA Soluciones Tecnológicas