FIC Vía XIV proxectará "Fillas de Galicia, Macorinas", documental sobre emigración

(10/08/2020)

FIC Vía XIV proxectará "Fillas de Galicia, Macorinas", documental sobre emigración

Establece analogías de mulleres galegas en Cuba coas inmigrantes

 

 

Documental sobre mulleres galegas en Cuba e inmigrantes.

 

A próxima edición do FIC Vía XIV, Verín, acollerá a proxección do documental histórico Fillas de Galicia , Macorinas, dirixido por Xosé Lois Santiago "Pello" e Fran Naveira. Trátase dun traballo que conta a historia de explotación dunha parte da emigración feminina galega a Cuba, establecendo analogías con situacións que suceden na actualidade con migrantes en diferentes partes do mundo.

O documental narra a historia da asociación "Fillas de Galicia", formada por esas mulleres emigradas galegas e pon de manifesto diversas historias de protagonistas que sufriron enganos para entrar a formar parte da prostitución cubana a comezos do século pasado.

Tal e como relata "Pello", obter información, datos e imaxes destas mulleres emigrantes galegas converteuse nun labor moi complicado, debido principalmente ao escurantismo e ás doses de vergoña que implica o concepto de prostitución.