O PP consegue o escano 42 do Parlamento galego tras o escrutinio do voto exterior na provincia de Pontevedra
(20/07/2020)
O PP consegue o escano 42 do Parlamento galego tras o escrutinio do voto exterior na provincia de Pontevedra
Elena Fernández, Pontevedra | 20 Julio 2020 - Crónicas da Emigración
O reconto tivo lugar no Palacio de Xustiza de Pontevedra.
O PP consegue ao fin co voto do CERA (Censo Electoral de Residentes Ausentes) o deputado 42 que lle arrebatou o PSdeG-PSOE a última hora na noite electoral. Con 746 votos, fronte aos 340 dos socialistas, os populares obteñen un escano máis no Parlamento galego e melloran nun deputado o número de representantes dos comicios autonómicos de 2016.
O PP necesitaba o dobre de deputados e 50 máis que o PSdeG para conseguir o escano 11 por Pontevedra, o que foi factible tras o reconto desta mañá no Palacio de Xustiza da cidade do Lérez.
O resto dos 1.920 votos, depositados en urna nesta ocasión distribúense entre o BNG, que obtivo 414 sufraxios; Galicia en Común- Anova-Mareas (168), Vox (99), Cidadáns Partido da Cidadanía (45), Partido Animalista (31), Recortes Cero (14), Equo-Galicia (12), En Marea-Compromiso por Galicia-Partido Galeguista-Marea Galeguista (9), por un Mundo mais Xusto (7), Partido Comunista dos Traballadores de Galiza (4), Cidadáns de Galicia (3), Unión Progreso e Democracia (2) e Unidos polo Futuro e Escanos en Branco, que obtiveron 1 voto cada un.
Nunhas eleccións marcadas polos problemas derivados da crise do Covid-19, o número de votantes no exterior pola provincia de Pontevedra descendeu dos máis de 3.000 rexistrados en 2016 aos 1.920 nesta ocasión, dos cales dous foron nulos e 22 en branco.