A sardiñada universal de embaixada. gal asolagou o mundo da diáspora da celebración de San Juan

(02/07/2020)

A sardiñada universal de embaixada. gal asolagou o mundo da diáspora da celebración de San Juan


Redacción, Frankfurt | 01 Julio 2020 - Crónicas da Emigración

embaixada. gal, a plataforma internacional, informativa e participativa creada no 2018 por galegas e galegos migrantes e non migrantes cuxo punto de inflexión é divulgar a Galeguidade polo mundo, celebrou exitosamente unha sardiñada universal e virtual con gran participación. Embaixada. gal deulle vida a unha sardiña de nome Embaixada que, tras varios meses confinada nas costas galegas debido ao Coronavirus, decidiu deixarse arrastrar polas correntes dos mares do mundo en busca de amigas coas que compartir e gozar dunha noite tan especial e chea de tradicións e costumes como o é a noite de San Juan.

Alejandra Plaza e Xosé Lois Lucio encabezaron esta iniciativa repartindo un formato de sardiña á que os participantes deron vida con grandes creacións artísticas e marabillosas mensaxes.

“E fomos larghando rede, así, con gheada... ese xeito das nosas costas, tan fermoso e tan noso. E fomos larghando rede sen saber como iría o mar, canta fartura habería… e o peixe foi entrando, primeiro paseniño, logo nunha crecente avalancha. Percorremos todos os mares e de cada un deles foi entrando o froito da irmandade. Dende Asia a Europa, dende Europa ás Américas, dende Galiza a todo ou mundo. Porque somos e seremos pobo. Porque somos mariñeiros e pescadores de verbas, de ideas, de creación desbordada”, declarou embaixada. gal.

Os alumnos do CEIP O Puntal (Bédar, Almería), os alumnos do CRA Nosa Sra. Do Faro (Ponteceso, Malpica, Cabana, Mens, Barizo, Xornes, Tallo, Tella, Campara, Pazos, Brantuas),O Demos da Petaca, Pésdebarro, Brocken Peach, Defende a galega (traballadores da Radio e Tele públicas galegas), Zénzar, Radio ATribo. gal, Elena Ferro, Asanog (asociación nenos oncolóxicos de Galicia), asociación de nenos sen recursos de España ASRE, O Combo Dominicano, Vito Diéguez fotografía, Agrupación Hijos de Galicia de Sestao, Irmandade Galega de Rubí, Asociación Ou Fol, ACG Agarimos de Badalona, Lito Vila Baleato, Rega UK, Galegas na Diáspora, Grupo do Mileño Cantareiros, Asociación Territorio Verde, Centros galegos de: S.M. de Comodoro, de Mar de Plata, de Rosario, La Plata, Sociedade Galega de Arantei, Vilamarin e a Peroxa achegaron o seu graiño de area do mesmo xeito que diferentes participantes de Francia, Italia, Suíza, Finlandia, Holanda, Bélxica, Alemaña, Xapón, Malta, Arxentina, Reino Unido, Bosnia, Perú, España, Rusia…

Coa recollida de máis de 150 sardiñas de todo o mundo, embaixada. gal creou un gran banco de sardiñas en forma de cartel interactivo cheo de actividades que se pode imprimir e buscar cantas sardiñas hai, que sardiñas están repetidas, que sardiña vai ao revés ou personalizar a sardiña que está en branco.

“Estamos sorprendidos pola gran participación nesta iniciativa. Levamos varias realizadas e xa temos outras en curso pero esta foi un pouco caótica pola inmensidade colaborativa pero moi satisfactoria. Nenos de colexios ou do oncolóxico utilizaron a nosa proposta como unha actividade didáctica. Ver que nenos sen recursos e sen acceso ás novas tecnoloxías debuxaron as súas propias sardiñas para poder participar... Mensaxes tan impactantes nalgúns casos como o dun mozo galego que saíu ileso do ataque terrorista que Alemaña sufriu na cidade de Hanau no mes de febreiro. Só podemos dicir grazas por confiar en nós. Artistas, artesáns, escritores... colaboraron tamén. Esperemos que para a próxima actividade a Xunta queira participar tamén. Escribiunos moita xente pedindo información para colaborar connosco en sucesivas propostas. A xente sentiuse moi unida e sen distancias. Doutra banda, quero agradecer ao grupo Os Farrapos de Cesullas por crear unha letra e unha xota para a sardiñada de embaixada. gal”, comentou Alejandra PLaza.

Paralelamente ao banco de sardiñas, Xosé Lois Lucio lanzou unha primeira estrofa para acompañar a esta sardiña viaxeira á que os seguidores da plataforma deron continuidade dando vida á poesía Sardiñada Universal 2020.

“Empezaron a chegar estrofas e estrofas, pero aí non acabou todo. Esas estrofas cobraron vida a través das voces da cantareira de Cerqueda Begoña do Manso, Estela Arnaud, do grupo As Lerchas e O Fol, Ramón do Serrador de Oza, profesor e fundador da Asociación- Escola O Alprende, a cantante Belém Tajes, ex de Luar na Lubre e actual integrante de Aliboria, Irma Macías, cantante de Luar na Lubre, a Alfredo, do grupo A Roda, a Serxio Núñez, de Tiruleque e Comando Curuxás e, como non, polo noso compañeiro Lucio”, engadiu Alejandra Plaza

Nuns días embaixada. gal publicará o resumo desta colaborativa e internacional iniciativa.