O secretario xeral da Emigración, Antonio Rodríguez Miranda, vén de aprobar unha remodelación dos principais programas que desde hai décadas buscan estreitar os lazos entre a colectividade galega do exterior e a da comunidade. Esta modificación busca adaptar a actividade do departamento autonómico á nova realidade internacional, instaurada como consecuencia da pandemia do coronavirus, que está a afectar en diferente grao a todos os países con maior presenza galega. 

Logo dunha extensa rolda de consultas aos galegos e galegas dos estados e rexións cunha poboación galega máis numerosa, tanto con representantes da colectividade de cada país como á propia Comisión Delegada do Consello de Comunidades Galegas e os propios subdirectores e xefes e xefas dos respectivos servizos da Secretaría Xeral, o responsable de Emigración decidiu suspender temporalmente aqueles programas que impliquen desprazamentos internacionais.

A situación xerada pola COVID-19 fai desaconsellable e pouco prudente manter programas como Reencontros na Casa, Reencontros na Terra, Conecta con Galicia, Escolas Abertas ou Obradoiros, xa que supoñen un risco sanitario, non só para as e os beneficiarios, senón para as súas familias ou, no seu caso, monitores, monitoras e calquera outra persoa que entre en contacto con algunha posible persoa contaxiada. No caso dos programas de Reencontros, os beneficiarios e beneficiarias pertencen, ademais, a un dos principais grupos de risco, o das persoas maiores de 60 anos; e no de Conecta con Galicia gran parte deles e delas son menores de idade, o que tamén complica a celebración destas actividades. A estas dificultades hai que engadirlles as restricións de mobilidade e o peche das fronteiras impostas polos gobernos dos diferentes países de orixe, e destino, das e dos participantes, que en moitos casos non se levantarán ata despois do verán, mentres que estes programas celébranse na súa inmensa maioría no mes de xullo. As e os representantes da colectividade coincidiron, así, en sinalar a conveniencia de pospoñer a continuidade destas iniciativas do departamento autonómico ata o vindeiro ano ou ata que a situación sanitaria o recomende.

Aumento de axudas e novas medidas

Esta adaptación á nova realidade mundial tamén permitirá redistribuír os fondos que a Secretaría Xeral da Emigración ten reservados para os gastos de funcionamento e para o financiamento das actividades dos centros galegos de todo o mundo, que están a sufrir dun xeito especialmente duro os efectos da pandemia, xa que levan semanas pechados sen poder continuar coa súa rutina. Por iso, a Xunta aprobou recentemente a continuidade destes programas, o que permitirá ao departamento que dirixe Antonio Rodríguez Miranda ampliar nun 50% as axudas para sufragar parte dos custos de mantemento e operatividade das entidades galegas no exterior, así como mellorar as das actividades que si se leven a cabo.

Ademais, o Goberno galego está a activar outras medidas que axuden á colectividade do exterior a afrontar esta crise con recursos, como a continuidade das Axudas Económicas Individuais dos galegos e galegas en situación de necesidade, cuxa resolución se axilizará o máximo posible. Ou a creación da Aula Galicia Aberta, que pretende paliar as limitacións que as restricións de mobilidade están a impoñer tanto ás e aos particulares como aos centros galegos de todo o mundo, e que están a condicionar gravemente as actividades en materia de formación das entidades galegas no exterior.

A Xunta de Galicia segue a estudar, así mesmo, outras accións que poidan axudar aos galegos e galegas do exterior a superar esta pandemia sufrindo as menores consecuencias negativas posibles.