Preocupación en Ourense no colectivo de emigrantes venezolanos: “Isto agrávase

(13/04/2020)

Preocupación en Ourense no colectivo de emigrantes venezolanos: “Isto agrávase"

Venezolanos, durante unha concentración en Ourense (arquivo)


A Rexión Internacional
Elisabet Fernández 13/04/2020


Os venezolanos convertéronse  nos últimos anos na comunidade extranxeira máis grande da provincia. O colectivo repartiuse por Ourense, dando vida a lugares como Carballiño, Ramirás, Celanova ou A Merca. Tamén na cidade. A crise sanitaria agrava a situación de gran parte dos que acaban de aterrar en busca dunha mellor calidade de vida. A asociación Alma Llanera, que acolle aos venezolanos na provincia, estima que se empadroan no Concello de Ourense dous venezolanos ao día. As estatísticas deixan fóra aos de dobre nacionalidade, un colectivo que aumenta a cifra. En palabras do presidente de Alma Llanera, Lorenzo González, “estes retornados incrementan ata 10.000 venezolanos actualmente na cidade, e uns 20.000 na provincia”.

Sectores paralizados

“Esta situación pillou a moitos venezolanos recentemente chegados en bragas, xusto cando estaban a arranxar papelada e trámites. Moitos se dedicaban a coidado de persoas maiores e nenos ou labores do fogar e víronse no paro”, sinala González. Hai preocupación. “É complicado. Xa nos reunimos telemáticamente desde a Federación de Venezolanos en Galicia falando do tema. Hai falta de traballo, non se poden homologar os títulos… Todo isto fixo que a situación económica e persoal de moitos se viu agravada”, apunta.

O comedor social de Cáritas e a Cruz Vermella son as entidades coas que Alma Llanera traballa para dar solución aos seus compatriotas nestes días. “Ao comedor enviamos irmáns venezolanos, máis do que nos gustaría. E Cruz Vermella tamén axuda coa repartición de alimentos. Ademais, estamos a tentar facer provisión do pouco que hai aquí para enviar alá. Temos a preocupación maior de Venezuela, que non está preparada para este virus. O colectivo venezolano está a pasalo francamente mal, pero o venezolano está afeito ás penurias. Venezuela está en corentena constante”, di o presidente de Alma Llanera. Alégrase de que esta situación “estea a servir para que contraten a sanitarios venezolanos e véxase a nosa valía”. Calcula que nos dous últimos meses pasaron pola oficina 300 venezolanos recentemente chegados.

Axuda de entidades sociais

Virgilio Morello, director da Oficina de Atención ao Retornado, agradece que “en cuestión de alimentación as institucións estean a traballar para prestar bos servizos”. Teme polos venezolanos sen contratos: “A situación está paralizada e veremos como llas apañan despois de que pase todo isto”.

A hostalería que resiste

María Isabel Quintero é responsable de Ysabelle Gourmet, tenda especializada en produtos venezolanos que estes días sobrevive grazas á repartición a domicilio. “Temos unha carteira de clientes, pero isto foi un declive económico total. Hai xente que pide e hai días que non hai pedidos, moitos quererán aforrar. Non sabemos cal será a curva, pero é complicado saber que pasará”.