Exteriores crea unha plataforma para contactar a viaxeiros bloqueados con residentes españois no estranxeiro

(06/04/2020)

Exteriores crea unha plataforma para contactar a viaxeiros bloqueados con residentes españois no estranxeiro

Redacción, Madrid | 03 Abril 2020 - Crónicas da Emigración

Cartel anunciador do Servizo Aloxa. Cartel anunciador do Servizo Aloxa.

O Ministerio de Asuntos Exteriores, Unión Europea e Cooperación acaba de poñer en marcha a plataforma Aloxa, un servizo solidario de urxencia para asistir aos españois que se atopan bloqueados no estranxeiro co obxectivo de facilitar o contacto entre cidadáns españois que residen no exterior e que desexen ofrecer aloxamento a viaxeiros españois que aínda non puideron regresar a España e que necesitan unha solución habitacional temporal.

As persoas que desexen usar este servizo tanto para ofrecer como para demandar aloxamento deben encher un sinxelo formulario con algúns datos básicos (identificación, dirección de correo electrónico, país e poboación onde ofrecen ou demandan aloxamento), preservando a confidencialidade dos usuarios. Tanto as ofertas como as demandas de aloxamento expirarán de forma automática aos dez días.

A plataforma atópase dispoñible no seguinte enlace https://registroviajeros.exteriores.gob.es/Aloja.htmly limítase ao intercambio do contacto entre os solicitantes e os ofertantes. Calquera comunicación posterior restrínxese ao ámbito privado.

20.000 viaxeiros retornados

Coas chegadas dos próximos voos ao longo desta fin de semana, xa serán 20.000 viaxeiros españois os que puideron regresar a España grazas ás xestións das embaixadas e consulados no mundo. A maioría de regresos proceden de Europa (9.000) e América (7.000) seguido de África e Oriente Medio (3.000) e Asia-Pacífico (1.000)

Á espera de que cheguen os voos procedentes de Arxentina e de Perú a próxima semana, aínda continúan rexistrándose operacións en Iberoamérica. As últimas producíronse con voos doutros países, principalmente de Alemaña e Francia, e permitiron que retornen a España 32 viaxeiros en voo de Francia e 25 en voo de Alemaña procedentes de Bolivia; 18 en voo de Alemaña procedentes de Nicaragua; e 11 españois que estaban en Paraguai e que regresaron en voo de Alemaña.

De Marrocos chega este venres un voo con 170 pasaxeiros a bordo (sumando a cidadáns españois e europeos) que saíu á primeira hora da tarde desde Casabranca aos que hai que sumar outros 15 adultos e un bebé que saíron en autobús desde Tánxer, ademais de seis españois que estaban na República Democrática do Congo e que puideron formar parte da pasaxe dun avión italiano grazas ás xestións da Embaixada de España.

Aínda que de momento quedan 2.400 viaxeiros da Unión Europea en Filipinas, pouco máis de 250 son españois grazas a que as xestións do Consulado de España xa facilitaron a saída dun total de 379 españois desde o pasado 15 de marzo. Para os que aínda quedan por saír, tense provisto a todos eles dunha carta asinada polo cónsul xeral subliñando a necesidade de que se dea libre acceso aos viaxeiros estranxeiros a todo tipo de medios de transporte para chegar ao aeroporto internacional.

A situación de moitos destes viaxeiros, que optaron por permanecer en Filipinas a pesar das reiteradas recomendacións de abandonar o país, comeza a complicarse pola situación da infraestrutura sanitaria en determinados puntos do país e polas dificultades que algúns atopan agora para o seu regreso a España. Con todo, están a ofrecerse diferentes alternativas a todos eles, tanto a través das aerolíneas como coas operacións que realizan outros países, para que a súa saída sexa o máis rápida posible.