Aberto o prazo para solicitar as axudas extraordinarias deste ano para emigrantes retornados

(17/03/2020)

Aberto o prazo para solicitar as axudas extraordinarias deste ano para emigrantes retornados

Redacción, Vigo | 17 Marzo 2020 - Crónicas da Emigración


O Diario Oficial de Galicia (DOG) deste luns, día 16, publicou a convocatoria das axudas extraordinarias 2020 para emigrantes retornados, cuxo prazo de presentación de solicitudes estará aberto ata o 31 de agosto; así como as bases reguladoras desta convocatoria.

Este programa, que se enmarca na Estratexia Retorna 2020, está destinado a axudar a facer fronte aos gastos extraordinarios dunha unidade familiar con poucos recursos no momento do seu retorno a Galicia e conta cun orzamento de 1.900.000 euros, que poderá verse ampliado no caso de que haxa necesidade e dispoñibilidade orzamentaria.

Poderán recibir estas axudas persoas galegas e nadas en Galicia, os seus cónxuxes ou persoas análogas á relación conxugal, así como os seus fillos. Os beneficiarios das axudas deberán estar en posesión da nacionalidade española antes de retornar, estar empadroado e ter residencia nalgún concello de Galicia, residir legalmente no estranxeiro un mínimo de tres anos inmediatamente anteriores á data do retorno e carecer de recursos económicos suficientes na unidade familiar.

Ademais, non deberá transcorrer máis de dous anos entre a data do retorno a España e a data de solicitude da axuda. Tampouco poderán ser beneficiarios aqueles que recibisen a axuda nos tres últimos anos.

Considéranse recursos económicos insuficientes cando a suma da media dos ingresos que perciba cada membro da unidade familiar, nos dous meses anteriores ao da presentación da solicitude, dividido entre o número de persoas que a integran non superan o importe do IPREM mensual (indicador público da renda de efectos múltiples) vixente na data da solicitude.

Esta axuda, que se outorgará cun pago único, será de 300 euros para os beneficiados procedentes de Europa e de 800 euros para os beneficiarios procedentes de fóra de Europa. A estas contías sumaránselles 1.000 euros polo primeiro e segundo fillo e 1.500 euros a partir do terceiro. Así mesmo, o importe incrementarase un 25% se a familia fíncase nun municipio rural.

A solicitude presentarase preferiblemente por vía electrónica a través do formulario electrónico normalizado que aparece na convocatoria do DOG e que tamén está dispoñible na sede electrónica da Xunta https://sede. xunta. gal. Tamén se poderán presentar de maneira presencial en calquera dos lugares e rexistros establecidos na normativa reguladora do procedemento administrativo común.

AXUDAS E SUBVENCIÓNS