O novo sistema de inmigración británico arrincará no 2021

(17/02/2020)

O novo sistema de inmigración británico arrincará no 2021

A decisión foi aprobada na primeira reunión do Gabinete tras a súa remodelación

O 1 de xaneiro do 2021 o Reino Unido non só deixará completamente a UE, senón que ademais comezará a aplicar un novo sistema de migración, mediante o cal os estranxeiros que desexen instalarse no país deberán someterse a un proceso que adxudicará os permisos de residencia ou traballo aos candidatos segundo a súa idade, sexo, profesión e coñecementos do idioma. Así o aprobou este venres o Goberno, que deu luz verde á promesa electoral de Boris Johnson de copiar o modelo australiano durante a primeira reunión tras a remodelación do Gabinete e a renuncia do titular de Economía, Sajid Javid.

«O sistema será simple e xusto e non discriminará entre países, á vez que permitirá o regreso do control da inmigración ao pobo británico», dixo un portavoz do 10 de Downing Street. A pesar de que non se deron detalles do novo sistema, que se prometeron para a próxima semana, desde o Goberno adiantaron que o novo réxime reducirá o número de inmigrantes, pois «acabará coa dependencia da importación de man de obra barata e pouco cualificada». O Gabinete de Johnson fixo caso omiso ás recomendacións do Comité Asesor de Inmigración, que advertiu que o modelo australiano podería ser negativo para o crecemento do país ao complicar a contratación dese tipo de man de obra.

 A aprobación do sistema migratorio e outros xestos mostrados este venres revelan que Johnson parece ter logrado o seu obxectivo de ter un Goberno totalmente fiel. É a impresión que deixou un vídeo no que esixe aos seus colaboradores «cumprirlle á xente» en tres áreas: redución do crime, do número de sintecho e da listas de espera nos hospitais.

No vídeo, o premier pregúntalle ao seu Gabinete cantos hospitais van construír e un ministro responde : «40». Logo pregunta cantos novos policías se van a contratar e outro replica: «20.000». No entanto, antes destas imaxes os británicos almorzáronse coa renuncia doutro ministro. Trátase de Jake Berry, responsable da modernización do Norte.