A Laracha participa en Lituania no segundo foro sobre a crise migratoria

(07/02/2020)

A Laracha participa en Lituania no segundo foro sobre a crise migratoria

Acudiron o alcalde, José Manuel López Varela, e os concelleiros Ramiro Bello e Cristina Vieites

O Concello da Laracha forma parte do segundo foro incluído no proxecto europeo sobre crise da migración, que leva a cabo estes días na cidade lituana de Kaunas. Trátase da segunda toma de contacto dos socios participantes despois do foro celebrado na Laracha o pasado mes de novembro.

Os participantes nesta segunda iniciativa representan a 20 municipios e entidades de 19 países europeos. O Concello larachés, que lidera o proxecto, está a representar en Lituania polo alcalde, José Manuel López Varela, e os concelleiros Ramiro Bello e Cristina Vieites.

A temática a desenvolver estes días en Kaunas xira ao redor da crise migratoria que vive na actualidade a Unión Europea. En Kaunas, os participantes a esta conferencia tratarán de dar respostas ao proceso migratorio global desde os valores da comprensión, a integración e a creación de novos puntos de vista para entendela e afrontala.

«Estase a facer a través do diálogo e da reflexión social para contribuír a mellorar a comprensión cidadá da Unión Europea, a súa historia e diversidade, ademais de fomentar a participación democrática en relación ás políticas de migración e promover o voluntariado e o compromiso intercultural», apuntou o alcalde larachés á súa chegada á cidade de Kaunas.

O arranque do foro consistiu na recepción que a cidade lituana ofreceu a todos os participantes neste foro, por parte do vicealcalde, Mantas Jurgutis, e tamén un encontro no instituto de secundaria Ausros Gimnazija.

Para a xornada de hoxe está prevista a visita oficial ao centro de refuxiados de Rukla.