Agustín Torres convida os mozos a retornar a España durante a súa visita ao instituto galego-arxentino Santiago Apóstolo

(14/10/2019)

Agustín Torres convida os mozos a retornar a España durante a súa visita ao instituto galego-arxentino Santiago Apóstolo


Mariana Ruiz, Buenos Aires | 11 Outubro 2019 - Crónicas da Emigración

Agustín Torres explica aos mozos de 4º e 5º ano do Instituto Santiago Apóstolo o contido do programa ‘Visar’.

O secretario xeral de Inmigración e Emigración, Agustín Torres, acompañado polo secretario xeral da Consellería Laboral española en Arxentina, Juan Hernández, visitou, este venres, o instituto galego-arxentino Santiago Apóstolo, no marco da rolda de visitas institucionais á colectividade española que realiza na cidade de Buenos Aires.

Alí recibírono o director xeral do Colexio, Carlos Brandeiro; a vicedirectora do nivel inicial e primario; o reitor do nivel secundario, Juan Domingo Rodríguez; o apoderado do instituto e patrón da Fundación Galicia América, Juan Manuel Peleteiro; e Arturo Pérez, tamén patrón da Fundación que xestiona a escola.

Na sede do establecemento educativo, percorreu as instalacións, conversou con nenos de primaria e mantivo un encontro cos alumnos de cuarto e quinto ano do secundario, no que os adolescentes se interesaron pola posibilidade de realizar ou continuar estudos de grao e posgrao en España.

Pola súa banda, o titular da carteira de Inmigración e Emigración explicoulles de que se trata o programa ‘Visar’ que puxo en marcha o Ministerio de Traballo, Migracións e Seguridade Social para promover que mozos descendentes de españois, sen dobre nacionalidade, poidan radicarse e buscar traballo na Península Ibérica.

Ao termo do percorrido, Agustín Torres constatou o labor educativo e o estado deste centro educativo durante a reunión que mantivo con directivos do colexio e da Fundación Galicia América.