Emigración prolonga ata o 31 de outubro o prazo para solicitar as axudas extraordinarias a retornados

(07/10/2019)

Emigración prolonga ata o 31 de outubro o prazo para solicitar as axudas extraordinarias a retornados

Redacción, Santiago | 05 Outubro 2019 - Crónicas da Emigración

A Secretaría Xeral de Emigración decidiu ampliar ata o 31 deste mes de outubro o prazo para que os emigrantes galegos retornados poidan solicitar as axudas extraordinarias para facer fronte aos gastos de carácter familiar derivados do seu retorno á comunidade autónoma.

Poderán beneficiarse das mesmas os galegos e nados en Galicia, ademais dos seus fillos e cónxuxes, que acrediten a nacionalidade española, así como a súa residencia actual en Galicia.

Entre os requisitos esíxese residir legalmente no estranxeiro un mínimo de tres anos ininterrompidos inmediatamente anteriores á data do seu retorno a España, non transcorrer máis de dous anos entre a data de retorno e a de presentación de solicitude e carecer de recursos económicos suficientes na unidade familiar, así como de bens patrimoniais.

A resolución das axudas, que se aprobou en decembro de 2018 e foi publicada no DOG o 14 de febreiro de 2019, establecía finais de agosto como data tope para solicitar as contías. O prazo foi ampliado posteriormente ata finais de setembro, debido a que aínda quedaba crédito para atender a un maior número de solicitudes das presentadas. Por este mesmo motivo, o departamento de Emigración da Xunta decidiuse por unha segunda ampliación do prazo e puxo como data límite para solicitar as axudas o 31 de outubro.