(27/06/2019)
Enfado dos retornados na súa volta ás rúas de Ribeira
Os pensionistas comparan a súa situación coa dos emigrantes lusos, aos que o seu goberno ofrece unha gratificación
Ribeira 26/06/2019
A plataforma de emigrantes retornados volveu esta mañá ás rúas de Ribeira, e os xubilados que participaron na manifestación fixérono especialmente enfadados porque Facenda volveu a cargas as tintas sobre eles. A todos os que xa formalizaron a declaración do IRPF, que son a maioría dos integrantes do colectivo, saíulles a pagar, algo que xa sabían, pero a contía é maior que en exercicios precedentes; a iso súmase que comezaron a chegar de novo as multas a quen aínda non declararan nunca polas pensións que reciben dos países aos que tiveron que marcharse a traballar.
Coa consigna de sempre, a do trato igualitario con respecto aos demais pensionistas, os xubilados volveron poñerse detrás da pancarta. Entre eles, un matrimonio formado por un portugués e unha galega que comentaban a gratificación que o país luso ofrece aos retornados para que volvan ao seu lugar de orixe, e que ademais non teñen a obrigación de declarar se os seus ingresos son inferiores a 20.000 euros: «Non imos para Portugal porque para iso tamén quedabamos nos países non que traballamos». Xosé Deira, portavoz da plataforma barbancesa, non lles quitaba a razón: «Dá pena oír isto, que unha economía como a lusa sexa capaz de facer iso e que en España esteamos así».
Neste contexto, Facenda volveu a poñer o foco nos emigrantes retornados do mesmo xeito que fixera fai uns seis anos, con multas -ás que se suman os intereses correspondentes- para aqueles que non declararon nunca as súas pensións. O que se lles reclama corresponde ao exercicio 2015 e a estas persoas non queda máis remedio que pagar, aínda que o que se lles aconsella desde a plataforma barbancesa é que declaren tamén os seus ingresos nos anos posteriores -2016, 2017 e 2018- porque Facenda acabará esixíndollo tamén e farao con novas multas e recargas.
A boa noticia para o colectivo nas últimas semanas é que se confirmaron dúas novas sentenzas favorables aos retornados procedentes de Alemaña, que tiñan un réxime diferente polo convenio que existía co país xermano.
OBXECTIVOS | INTEGRACIÓN | FERRAMENTAS | LEXISLACIÓN | ORGANISMOS | NOVAS | CONTACTO
(c) 2009 FEGAMP, Federación Galega de Municipios e Provincias :: Texto legal
inmigracion@fegamp.es
Desarrolo: AVA Soluciones Tecnológicas